ठाण्याजवळ शहापूर तालुक्यातील सरलांबे येथे समृद्धी महामार्गाचं काम सुरु असतानाच मोठी दुर्घटना घडली आहे. पुलाचं काम सुरु असताना गर्डर मशिन कोसळून १८ कामगारांचा मृत्यू झाला आहे. तर मशिनच्या सांगाड्याखाली काही जण अडकल्याची शक्यता आहे. ही दुर्घटना कशी झाली याची चौकशी केली जाईल असं मुख्यमंत्री एकनाथ शिंदे यांनी म्हटलं आहे. तसेच मृतांच्या कुटुंबीयांना नुकसान भरपाई देखील जाहीर करण्यात आली आहे.

तर ही दुर्घटना नेमकी कशी घडली आणि त्यावेळी काय स्थिती होती यासंबधीची माहिती त्याठिकाणी काम करणाऱ्या प्रत्यक्षदर्शीने सांगितलं आहे. प्रत्यक्षदर्शीने सांगितले आहे की, 'मी पिलरजवळ काम करत होतो, तेव्हा क्रेन कोसळली, गर्डरही कोसळलं, त्याच्याखाली मजूर दबले गेले. या दुर्घटनेत माझ्या ओळखीचे आणि जवळचे चार जण होते.

काही समजण्याच्या आतच गर्डरसकट क्रेन देखील खाली कोसळली. त्या व्यक्तीने सांगितले की, मी आणि आणखी एक व्यक्ती बाहेर निघाली असंही त्याने पुढे सांगितले आहे.

मृतांच्या नातेवाईकांना नुकसान भरपाई देण्याची घोषणा

या दुर्घटनेत मृत झालेल्यांना पंतप्रधान नरेंद्र मोदी यांनी भावपूर्ण श्रध्दांजली अर्पण केली आहे. तसेच मृतांच्या नातेवाईकांना पंतप्रधान राष्ट्रीय सहाय्यता निधीतून दोन दोन लाख रुपयांची मदत दिली जाणार आहे. तर जखमींना 50 हजार रुपयांची मदत केली जाणार असल्याची माहिती पंतप्रधान नरेंद्र मोदी यांनी दिली आहे.

राज्य सरकारकडून पाच लाखांची मदत जाहीर

शहापूर सरलांबे येथे समृध्दी महामार्गावर मध्यरात्री क्रेन कोसळून झालेल्या दुर्दैवी अपघात हा अत्यंत दुर्दैवी आणि दुःखदायक आहे. या दुर्घटनेत आत्तापर्यंत १७ जण मरण पावले आहेत. मृत कामगारांच्या कुटुंबिंयांना प्रत्येकी पाच लाख रुपये मदतीची घोषणा केली असून जखमींवर तातडीने शासकीय खर्चाने योग्य ते उपचार करावेत असे निर्देश मुख्यमंत्री एकनाथ शिंदे यांनी दिले आहेत.