राज्याची जनता महाराष्ट्रातील नव्या सरकारला स्वीकारणार नाही. उद्धव ठाकरेंच्या नेतृत्वात शिवसेना पुढे जाणार आहे. बाळासाहेब ठाकरेंचे नाव म्हणजे आग, त्यामुळे आगीशी खेळू नका, असा इशारा शिवसेना खासदार संजय राऊत यांनी दिला आहे. शिवसेनेच्या पाठीत अनेकांनी वार केले आहेत, परंतु शिवसेना खचणार नाही, लढणार असंही त्यांनी बोलताना स्पष्ट केलं आहे. (Sanjay Raut on devendra Fadnavis and bjp)

आज मुंबईत त्यांनी माध्यमांशी संवाद साधला. यावेळी भाजपवर आणि उपमुख्यमंत्री देवेंद्र फडणवीस आणि एकनाथ शिंदेंसह बंडखोर आमदरांवार राऊतांनी निशाणा साधला. उपमुख्यमंत्री फडणवीस यांच्यासंदर्भात विचारले असता ते म्हणाले, बाळासाहेब ठाकरेंचे आशीर्वाद लाभले असते तर आज तुम्ही मुख्यमंत्री असता. बाळासाहेब ठाकरेंच नाव हे आग आहे, त्यामुळे आगीशी खेळण्याचा प्रयत्न करु नका. आतापर्यंत ज्यांनी आगीशी खेळण्याचा प्रयत्न केलाय त्यांचे केवळ हात नाही तरी राजकीय कारकीर्दही पोळली आहे, असंही सांगत त्यांनी भाजप नेत्यांना थेट इशारा दिला आहे. (maharashtra politics)

पुढे ते म्हणाले, नव्या सरकारला जनता स्वीकारणार नाही. बाळासाहेब ठाकरेंची शिवसेना उद्धव ठाकरेंच्या नेतृत्वात पुढे नेणार आहे. हीच शिवसेना भविष्यात राज्याचं नेतृत्व करेल, असा विश्वसही त्यांनी व्यक्त केला. महाराष्ट्राच्या मातीत संत तुकारामांचे अभंग चालतात, मंबाजींचे नाही, असा दाखल देत राऊतांनी विरोधकांवर टीकेची झोड उठवली आहे. शिवसेनेच्या पाठीत अनेकांनी वार केलेत. मात्र ते वार पचवून शिवसेना पुन्हा नव्याने उभी राहिली आहे.

चाळीस आमदारांच्या गटाला तुम्ही आज जर मुख्यमंत्री पद देत आहात, तर मग २०१९ साली शिवसेना हक्काची मागणी करत असताना तेव्हा बाळासाहेब ठाकरेंच्या शिवसेनेला तुम्ही का नाकारलं असा सवालही राऊतांनी उपमुख्यमंत्री देवेंद्र फडणवीस यांना केला आहे. तेव्हा हे सर्व बंडखोर आमदार पक्षात होते. तेव्हा बाळासाहेबांची असली शिवसेना आठवली नाही का?, असा सवालही त्यांनी केला आहे. शिवसेना फोडल्यानंतर मराष्ट्रात सुरु असणारी ढोंग बंद करा, असे खडे बोलही राऊतांनी सुनावले आहेत.