मुंबई : मुख्यमंत्री उद्धव ठाकरे यांनी मराठवाडा मुक्तीसंग्राम दिनाच्या निमित्ताने औरंगाबाद येथे एका कार्यक्रमात बोलताना 'आजी माजी आणि एकत्र आलो तर भावी सहकारी' असा उल्लेख केला होता. त्यानंतर राजकीय वर्तुळात चर्चांना उधाण आले. चंद्रकांत पाटलांनी एक दिवसांपूर्वी 'माजी मंत्री म्हणू नका' असे म्हटले होते. त्यामुळे आता सेना-भाजप एकत्र येऊन युती होणार का? असा तर्क वितर्क लढविले गेले. त्यावरच आता शिवसेनेचे खासदार संजय राऊत यांनी स्पष्टीकरण दिले आहे.

शिवसेना ही दिलेल्या शब्दांची पक्की आहे. आपला शब्द कधीही मोडत नाही. कोणाच्याही पाठीत खंजिर खुपसत नाही. कोणाला उगाच पतंग उडवायची असेल त्यांनी ती उडवावी. ज्यांनी शिवसेना फोडण्याची भाषा केली, ज्यांनी उद्धव ठाकरेंबद्दल अपशब्द वापरले त्यांच्यासोबत हातमिळवणी होऊ शकत नाही, असे संजय राऊत म्हणाले.

मुख्यमंत्री उद्धव ठाकरे यांची भाषण करण्याची एक पद्धत आहे. त्यांची ती ठाकरे शैली आहे. त्यांनी नवीन आघाडी होईल असं कुठंही सांगितलं नाही. मात्र, भावी सहकारी व्हायचं असेल तर ते शिवसेनेत येऊ शकतात. कोणीतरी तिकडे आहे, ज्यांना इकडे यायचं आहे. त्यांच्यासाठीच उद्धव ठाकरेंनी संकेत दिले आहेत, असं स्पष्टीकरण संजय राऊतांनी दिले.

.अशा पक्षाशी हातमिळवणी कशी करू?

“ज्या पक्षातल्या लोकांनी शिवसेना भवन फोडण्याची भाषा केली, मुख्यमंत्री उद्धव ठाकरेंबद्दल अपशब्द काढतात, कानाखाली मारण्याची भाषा करतात, ही जी नवीन संस्कृती समोर आली आहे, अशा पक्षांशी आम्ही हातमिळवणी कशी करू शकतो?”, असा सवाल देखील संजय राऊत यांनी उपस्थित केला.

मुख्यमंत्री नेमके काय म्हणाले होते?

मराठवाडा मुक्तीसंग्राम दिनाच्या निमित्ताने मुख्यमंत्री औरंगाबाद दौऱ्यावर होते. त्यावेळी औरंगाबाद येथे काही कार्यक्रम घेण्यात आले. अशाच एका कार्यक्रमाच्या मंचावर रावसाहेब दानवे आणि मुख्यमंत्री उद्धव ठाकरे एकत्र आले होते. त्यावेळी मुख्यमंत्र्यांनी भाषणाच्या सुरुवातीलाच 'आजी माजी आणि एकत्र आलो तर भावी सहकारी', असा उल्लेख केला होता.