मुंबई: संजय राऊत यांनी आज माध्यमांसमोर येत मनसेच्या लाऊडस्पीकर उपक्रमावर आपलं मत मांडलं आहे. तसेच भाजप ईडीचा गैरवापर करत असल्याचा पुनरुच्चारही खोचक पद्धतीने केला आहे. महाविकास आघाडीतल्या धुसफुसीबद्दल संजय राऊत यांचं वक्तव्य केलंय.

संजय राऊत यांनी म्हटलंय की, एखादा दुसऱ्या पक्षाचा पालकमंत्री असेल तर तो अन्य पक्षाच्या कार्यकर्त्यांकडे दुर्लक्ष करतो. अशा तक्रारी आहेत. यावर तोडगा काढावा लागेल. कारण प्रत्येक मंत्र्यानं फक्त घटक पक्ष नव्हे तर मविआचा घटक म्हणून काम केलं पाहिजे. पालकमंत्री कोणत्याही पक्षाचा असला तरी तिन्ही पक्षांचं काम झालं पाहिजे, असं त्यांनी म्हटलंय. हा प्रत्येक पालकमंत्र्यासाठी हा इशारा आहे. सरकार तीन पक्षांचं आहे, हे कुणीही विसरता कामा नये, असंही त्यांनी म्हटलंय.

मंत्रिमंडळातील फेरबदलाबाबतचा निर्णय सर्वोतपरी मुख्यमंत्र्यांचा आहे. सर्वपक्षीय आमदारांना चहापानाचं आमंत्रण देण्यात आलं आहे. आम्ही राजकीय, जातीय, धार्मिक फाळणीच्या विरोधात आहोत. आम्ही सगळ्या आमदारांना आमंत्रण दिलं आहे. आमच्या हृदयामध्ये सगळ्यांसाठी प्रेम आणि आस्था आहे. पुढे त्यांनी राज्यपालांवरही टीका करताना त्यांनी म्हटलंय की, आम्ही राज्यपालांशी संघर्ष करत नाही, तर संघर्ष करण्याची इच्छा त्यांची आहे.

मनसे-भाजपवर टीका

हायकोर्टाचा आदेश असूनही अनेक ठिकाणचे भोंगे हटवले नाहीयेत. यूपीतले भोंगे आहे तसे आहेत. गोव्यातले आहेत. काल गृहमंत्र्यांनी स्पष्ट आदेश दिले असून त्याचं पालन होणं गरजेचं आहे. तुम्ही भाजीची जुडी घेतली तरी भाजपचं तुमच्यावर लक्ष आहे. तुम्ही चिकनच्या दुकानात जरी गेलात तर काल किती घेतलं आणि आज किती घेतलं यावर भाजपचं लक्ष आहे. ताबडतोब ते इडीला कळवतील, त्यामुळे महाराष्ट्रातल्या जनतेनं सावध राहिलं पाहिजे, असा खोचक टोलाही त्यांनी लगावला आहे.