शिवसेनेतल्या अभूतपूर्व बंडानंतर आता संजय राऊत, आदित्य ठाकरे, उद्धव ठाकरे अॅक्शन मोडमध्ये आले आहेत. पुन्हा पक्ष बांधणीसाठी संजय राऊत दौऱ्यावर आहेत. दरम्यान, त्यांनी नाशिकमध्ये शिवसैनिकांना संबोधित केलं असून आक्रमक शैलीत मुख्यमंत्री शिंदे आणि त्यांच्या गटावर टीकास्त्र सोडले. अशातच त्यांनी हनुमान जन्माचा मुद्दा उपस्थित करत बंडखोरांना हनुमान आमचा, गदा आमची आणि तशी शिवसेना आमची असे म्हटले आहे.(sanjay raut statement about shivsena maharashtra politics)

हनुमान जन्मभूमिच्या वादाचा मुद्दा उपस्थित करत संजय राऊत यांनी बंडखोरांना शिवसेना आमचीच असल्याचे खडसावून सांगितले. 'हनुमानाच्या जन्मास्थळाच्या वादानंतर सर्व हिंदूचार्य एकत्र आले. आणि सांगितल हनुमानाचा जन्म नाशिक जिल्ह्यातील अंजनेरी मध्ये झाला. असे सांगत, हनुमान आमचा, गदा आमची, तशी शिवसेना आमची ' असे वक्तव्य संजय राऊत यांनी केलं आहे.

एकनाथ शिंदे गटाने बंड पुकारल्यापासून आपलाच गट हीच शिवसेना असल्याचा दावा केला होता. मात्र, दरम्यानच्या काळात या गटाने आता बाळासाहेब शिवसेना असेही गटाचे नामकरण केले होते. पण आता न्यायालयातील सुनावणीनंतर पुन्हा आपला गट हीच शिवसेना आहे.

आतापर्यंत शिंदे गट कोणत्या पक्षात विलिन होणार याला पूर्णविराम मिळाला का असा प्रश्न आहे. दुसरीकडे शिवसेना नेते हे काहीही झाले तरी शिवसेना आपलाच पक्ष राहणार आसल्याचा दावा करीत होते. मात्र, सत्ता स्थापनेचा दावा केल्यानंतर शिंदे गटातील वातावरण बदलले असून जे आमच्यासोबत नाहीत त्यांनाच अपात्र करणार असल्याचा दावा करण्यात आला आहे. त्यामुळे आता नेमकी शिवसेना आणि पक्ष प्रमुख काय भूमिका घेणार हे पहावे लागणार आहे.