मराठा आरक्षणासाठी राज्यातील वातावरण पेटल्याचं पाहायला मिळत आहे. मराठा आरक्षणासाठी सुरू असलेल्या मनोज जरांगे यांच्या आमरण उपोषणाचा आज सहावा दिवस आहे. अन्न-पाणी सोडल्याने जरांगे यांची तब्येत चांगलीच खालावली आहे.

त्यामुळे मराठा समाजाकडून त्यांनी पाणी तरी घ्यावं अशी मागणी करण्यात येत आहे. यावेळी नांदेड जिल्ह्यातील कंधार तालुक्यातून आलेली एक मुलगी देखील जरांगेंनी पाणी घ्यावं यासाठी मला त्यांना भेटू द्या अशी विनवणी करताना दिसली.

संतोषी नावाची ही मुलगी डोळ्यात पाणी आणून मला दोन मिनीटं तरी मनोज जरांगे यांच्याशी बोलू द्या अशी विनवणी करत होती. ...ते पाणी पित नाहीयते, मला दोन मिनीटं त्यांच्याजवळ येऊ द्या अशी विनंती करणारी ही चिमुरडी हातात पाण्याची बाटली घेऊन मामा प्लीज एक घोट तरी पाणी घ्या ना..., अशी कळकळीची विनंती करताना दिसली.

आंदोलनस्थळी माध्यमांशी बोलताना, ते हात दाखवत आहेत, पण पाणी पीतच नाहीयेत. मी रात्री दोन वाजता आई आणि बहिणीसोबत आले..असेही या मुलीने सांगितलं.

अन्न-पाणी सोडलेल्या जरांगे यांची प्रकृती ढासळत असल्याने मराठा समाजाकडून देखील त्यांनी पाणी घ्यावं अशी मागणी केली जात होती. अंतरवली सराटी येथे जमलेल्या नागरिकां नी हात जोडून तु्म्ही पाणी प्यावेच लागेल अशी विनवणी केली. यानंतर या विनंतीला मान देत भावूक झालेल्या मनोज जरांगे यांनी थोड्या वेळा दोन-चार घोट पाणी पिण्याचं मान्य केलं.

दरम्यान उपोषणस्थळी असलेल्या डॉक्टरांनी मनोज जरांगे यांच्या आरोग्याविषयी माहिती देताना सांगितलं की, सध्या मनोज जरांगेंवर उपचारांची खूपच गरज आहे. कारण पाच ते सहा दिवस झाले त्यांच्या पोटात अन्न नाही.

त्यामुळं डिहायड्रेशन खूप झालंय, त्यांना खूपच विकनेस आला आहे. बीपी पण कमी झालेला असणार आणि शुगर पण. जर अशीच परिस्थिती राहिली तर त्याचा त्यांच्या लिव्हरवर आणि किडनीवर खूप मोठा परिणाम होऊ शकतो. मात्र मनोज जरांगे यांच्याकडून सतत अन्न-पाणी यासोबतच वैद्यकीय उपचार देखील घेण्यास नकार दिला आहे.