सातारा : राज्य उत्पादन शुल्कमंत्री शंभूराज देसाई (Shambhuraj Desai) यांच्या पत्रकार परिषदांवर बहिष्कार घालण्याचा निर्णय साताऱ्यातील पत्रकार संघटनांनी एकत्रित घेतला आहे. सातारा जिल्हा पत्रकार संघाने (Satara Patrakar Sangh) साताऱ्यात हा निर्णय जाहीर केला.

शंभूराज देसाई यांनी काल घेतलेल्या पत्रकार परिषदेत प्रश्न विचारणाऱ्या पत्रकारांशीच हुज्जत घातली. प्रश्नाची माहिती न घेता पत्रकारांनाच आपला प्रश्न अपुऱ्या माहितीच्या आधारे आहे, असा प्रतिप्रश्न करण्याचा, तसेच आपल्या प्रश्नाला उत्तर द्यायला मी बांधिल नाही, असे उत्तर देण्याचा प्रकार त्यांच्याकडून सातत्याने होत होता.

त्यामुळे जर पत्रकारांच्या प्रश्नांना उत्तरे देण्यास ते बांधिल नसतील, तर पत्रकार परिषदेला जाण्यासही पत्रकार बांधील नाहीत. त्यामुळे त्यांच्या पत्रकार परिषदेवर यापुढे बहिष्कार टाकण्याचा निर्णय घेण्यात आला असून, मराठी पत्रकार परिषदेसह सर्व संघटनांचाही पाठिंबा आहे.

मराठी पत्रकार परिषदेचे जिल्हाध्यक्ष हरिष पाटणे, सातारा पत्रकार संघ अध्यक्ष विनोद कुलकर्णी, मराठी पत्रकार परिषद संलग्न सातारा जिल्हा पत्रकार संघ, सातारा पत्रकार संघ, इलेक्ट्रॉनिक मीडिया संघ, पत्रकार हल्ला विरोधी कृती समिती, डिजिटल मीडिया परिषदेचे पदाधिकारी उपस्थित होते.