गडचिरोली: महाराष्ट्र शासनाच्या इतर मागास बहुजन कल्याण विभागामार्फत कार्यान्वित होत असलेल्या परदेश शिष्यवृत्ती योजनेस मुदतवाढ देण्यात आली आहे.

दरवर्षी इतर मागास वर्ग व विमुक्त जाती भटक्या जमाती प्रवर्गातील ५० विद्यार्थ्याना परदेशामध्ये विशेष अध्ययन करण्यासाठी विद्यार्थ्यांना राजर्षी शाहू महाराज शिष्यवृत्ती योजनेअंतर्गत शिष्यवृत्ती प्रदान करण्यात येते.

राज्य शासनाच्या इतर मागासवर्गीय विभागाची अत्यंत महत्वाची योजना असून २०१८-१९ पासून राबविली जात आहे.

इतर मागास वर्ग व विमुक्त जाती भटक्या जमाती प्रवर्गातील मुला-मुलींना परदेशात पदव्युत्तर पदवी आणि संशोधनात्मक अभ्यासक्रमाचे (पी.एच.डी.) विशेष अध्ययन करण्यासाठी आर्थिक मदत देणे हा या योजनेचा मुख्य उद्वेश होय.

२०२३-२४ या शैक्षणिक वर्षात प्रवेश घेतलेल्या विद्यार्थ्यांकडून परदेश शिष्यवृत्तीसाठी अर्ज मागविण्यात येत आहे. अर्ज करण्याची अंतिम मुदत १५ जून २०२३ पर्यंत होती.

आता या अर्ज प्रक्रियेस मुदतवाढ देण्यात आली असून अर्ज स्वीकारण्याची अंतिम दिनांक ३० जून २०२३ ठेवण्यात आली आहे.

या योजनेअंतर्गत महाराष्ट्रातील इतर मागास वर्ग व विमुक्त जाती भटक्या जमाती प्रवर्गातील पदव्युत्तर पदवी आणि पी.एच.डी. साठी अद्ययावत जागतिक क्रमवारीच्या २०० च्या आतील परदेशातील शैक्षणिक संस्थेमध्ये प्रवेश घेणाऱ्या ५० विद्यार्थ्याना ही शिष्यवृत्ती मंजूर करण्यात येते.

परिपूर्ण अर्ज विहीत मुदतीत व आवश्यक त्या कागदपत्रांसह, संचालक, इतर मागास बहुजन कल्याण संचालनालय, ३ चर्च पथ, पुणे – ४११००१ या पत्यावर सादर करावा.