मुंबई : आमच्या सर्वांचे ठरले आहे, शिवसेनेचा मुख्यमंत्री व्हावा. आम्ही सगळे एकत्र आहोत आणि एकत्र राहणार आहोत. त्यांना 30 नोव्हेंबरला विधीमंडळात बहुमत सिद्ध करता येणार नाही, असे राष्ट्रवादी काँग्रेसचे अध्यक्ष शरद पवार यांनी सांगितले.
अजित पवारांच्या निर्णय राष्ट्रवादीच्या धोरणांच्या विरोधात आहेत. राष्ट्रवादीचा एकही नेता त्यांच्यासोबत राहणार नाही. जे सदस्य गेले त्यांना पूर्वीपासून माहिती होती. जे जाणार असतील त्यांनी लक्षात ठेवावे पक्षांतर बंदीचा कायदा आहे. त्यामुळे त्यांचे सदस्यत्व जाऊ शकते. महाराष्ट्राचा जनमानस भाजपविरोधात आहे. त्यामुळे जनमताविरोधात जाऊन निर्णय घेणार असेल तर त्यांचा मतदारसंघातील मतदार त्यांच्यासोबत राहणार नाही. पुन्हा निवडणूक झाली तर शिवसेना-राष्ट्रवादी काँग्रेस आणि काँग्रेस एकत्र मिळून त्या उमेदवाराचा पराभव केला जाईल. आमचे 10 ते 11 सदस्य त्यात सहभागी झाले होते. त्यातील सहा सदस्यांची माहिती मिळाली आहे. त्यानंतर एक-एक सदस्यांनी आमच्याशी संपर्क साधायला सुरवात केला आहे. राजेंद्र शिंगणे यांची राजभवनातून सुटका झाल्यानंतर त्यांना परत आणण्यात आले आहे, असे राष्ट्रवादी काँग्रेसचे नेते शरद पवार यांनी सांगितले.
शरद पवार म्हणाले, ''महाराष्ट्रात सरकार बनविण्यासाठी तिन्ही पक्षांची तयारी झाली होती. सरकार बनविण्यासाठी बहुमताचा आकडा या तिन्ही पक्षांकडे होते. पक्षाच्या चिन्हावर अधिकृतपणे निवडून आलेले सदस्य शिवसेनेचे 56, राष्ट्रवादीचे 54 आणि काँग्रेसचे 46 असे 156 सदस्यांसोबत काही अपक्षांसोबत ही संख्या 170 च्या आसपास जात होती. काल बैठक झाल्यानंतर काही गोष्टींवर चर्चा होणे गरजेचे होते. आज सकाळी सात वाजता एका सहकाऱ्याने कळविले आम्हाला येथे आणण्यात आले. सकाळी साडेसहा वाजता राज्यपाल सर्व कामे सोडून तयार आहेत, याचे आश्चर्य वाटते. अजित पवारांच्या नेतृत्वाखाली काही सदस्य त्याठिकाणी गेल्याचे कळाले. फडणवीसांनी मुख्यमंत्रीपदाची शपथ घेतल्याचे कळाले.''
राष्ट्रवादी काँग्रेसचे अध्यक्ष शरद पवार यांच्यासह शिवसेना पक्षप्रमुख उद्धव ठाकरे, आदित्य ठाकरे, एकनाथ शिंदे, सुभाष देसाई, दिवाकर रावते, मिलिंद नार्वेकर उपस्थित होते. तसेच राष्ट्रवादीचे प्रमुख नेते जयंत पाटील, जितेंद्र आव्हाड, हसन मुश्रीफ, दिलीप वळसे पाटील हेही यावेळी उपस्थित होते. अजित पवार यांनी भाजपसोबत जाऊन उपमुख्यमंत्रीपदाची शपथ घेतली होती. त्यानंतर ही प्रतिक्रिया देण्यात आली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.