मुंबई - राष्ट्रवादी काँग्रेसचे प्रमुख शरद पवार आणि उपमुख्यमंत्री अजित पवार यांच्यातील गुप्तभेटीमुळे राज्याचं राजकारण ढवळून निघालं आहे. सर्वच राजकीय पक्षांच्या नेत्यांनी यावर प्रतिक्रिया दिल्या आहेत. शिवाय शरद पवार यांनी देखील भेटीला कौटुंबिक भेट असल्याचं म्हटलं. तर अजित पवार यांनी देखील तेच सांगितलं. मात्र शिंदे गटाचे नेते संजय शिरसाठ यांनी वेगळाच दावा केला आहे.

संजय शिरसाठ म्हणाले की, शरद पवार यांनी आधीच स्पष्ट केलं की, त्यांचा पक्ष फुटलेला नाही. त्याचा तुम्हाला जो अर्थ काढायचा तो काढा. मात्र आमचं जास्त ताणलं म्हणून तुटल्याची कबुली संजय शिरसाठ यांनी दिली. तसेच भविष्यामध्ये महाविकास आघाडी टिकणार नसल्याचा दावाही शिरसाठ यांनी केला.

दरम्यान भाजपसोबत जाणाऱ्यांबाबतच्या राज ठाकरेंच्या वक्तव्यावर शिरसाठ म्हणाले की, कोणाच्या डोक्याला बंदूक लावून नेल असेल तर बंदुकीने नेलेले लोक जास्त काळ टीकत नाही. प्रेमाने नेलेले लोक जास्त काळ राहतात.

नवाब मलिकांची अजित पवार गटाच्या नेत्यांनी भेट घेतली. त्यावर शिरसाठ म्हणाले की, ते आजारी व्यक्तीला भेटायला गेले होते. मलिक हे आजारी आहेत. त्यांना राजकारण कशाला पाहिजे. आराम करावा. अल्लाहचं नाव घ्याव, असंही शिरसाठ म्हणाले.