मुंबईः अजित पवार यांच्या बंडामुळे राष्ट्रवादी काँग्रेस पक्षामध्ये उभी फूट पडली आहे. राष्ट्रवादीचे ३५ पेक्षा जास्त आमदार अजित पवार गटाकडे असल्याचं सांगितलं जात आहे. बंडानंतर ९ आमदारांनी मंत्रिपदाची शपथ घेतली होती.

आज अजित पवार गटाच्या ९ मंत्र्यांना खातेवाटप झालेलं आहे. दुसरीकडे शरद पवार गटाच्या पक्षाचे व्हिप जितेंद्र आव्हाड यांनी अजित पवार गटाच्या १२ आमदारांना नोटीस पाठवलेली आहे. ५ जुलै रोजीच्या पक्षाच्या बैठकीला अनुपस्थित राहून पक्षविरोधी कारवाई केल्याप्रकरणी ही नोटीस पाठवण्यात आलेली आहे. आमदारांना उत्तर देण्यासाठी ४८ तासाचा अवधी उरला आहे.

'या' आमदारांना नोटीस

सुनील शेळके, दिलीप बनकर, नितीन पवार, दीपक चव्हाण, इंद्रनील नाईक, यशवंत माने, शेखर निकम, राजू कारेमोरे, मनोहर चंद्रकपुरे, संग्राम जगताप, राजेश पाटील, माणिकराव कोकाटे; या आमदारांचा समावेश आहे.

दरम्यान, एकनाथ शिंदे गटाकडून अजित पवार गटाला तीन खाती गेली आहेत. यामध्ये पहिलं कृषी, दुसरं मदत आणि पुनर्वसन आणि तिसरं अन्न आणि औषध प्रशासन. या खात्यांचे मंत्री अनुक्रमे धनंजय मुंडे, अनिल पाटील आणि धर्मरावबाबा आत्राम हे असतील. तर भाजपकडून सहा खाती गेली आहे. यामध्ये अर्थ, सहकार, वैद्यकीय शिक्षण, अन्न व नागरी पुरवठा, क्रीडा, महिला आणि बालकल्याण या खात्यांचा समावेश आहे.