पुणे : केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबद्दल आक्षेपार्ह वक्तव्य केलं होतं. त्यानंतर राज्यात शिवसेना आणि नारायण राणे यांच्यातील वाद पेटला आहे. शिवसैनिक आक्रमक झाले असून राज्यभर आंदोलने केली जात आहेत. नारायण राणे यांच्यावर राज्यात विविध ठिकाणी गुन्हे आणि तक्रारी दाखल झाल्या आहेत. नाशिक आणि पुणे पोलिस नारायण राणे यांच्यावर कारवाई करण्यासाठी रवाना झाले आहेत. नाशिक पोलिस आयुक्त दीपक पांडे यांनी राणे यांना कायदेशीर अटक करण्यात येणार असल्याचं सांगितलं. राणे यांनी पत्रकार परिषद घेत, अटक करायला मी काय सामान्य माणूस वाटलो काय? अशी तिखट प्रतिक्रिया दिलीये. तर दुसरीकडे विरोधीपक्षनेते देंवेंद्र फडणवीस यांनीही भाजपची भुमिका स्पष्ट केली आहे. राणेंच्या विधानाच्या पाठीशी भाजप नाही, पण राणेंच्या पाठीशी मात्र पक्ष उभा आहे, असं फडणवीसांनी स्पष्ट केलंय. मुख्यमंत्री उद्धव ठाकरे यांच्याविरोधात केलेलं वक्तव्य नारायण राणे यांना भोवलं आहे. केंद्रीय मंत्री नारायण राणे यांना महाड पोलिसांनी अटक केली आहे. तर दुसरीकडे राष्ट्रवादी काँग्रेसचे प्रमुख शरद पवार यांनी याप्रकरणावर फारशी सविस्तर प्रतिक्रिया देणं टाळलं आहे.

मी राणेंना महत्त्वही देत नाही अशी प्रतिक्रिया राष्ट्रवादी काँग्रेसचे अध्यक्ष शरद पवार यांनी दिलीय. शरद पवार यांनी नारायण राणे प्रकरणावर बोलणं टाळलं आहे. त्यांनी म्हटलंय की, मला काही बोलायचं नाही. मी त्याला फारसं महत्व देत नाही. त्यांच्या पद्धतीने त्यांच्या संस्काराप्रमाणे बोलतात, अशा मोजक्याच शब्दात शरद पवारांनी प्रतिक्रिया दिली आहे.