मुंबई - राष्ट्रवादी काँग्रेसचे प्रमुख शरद पवार यांनी आज दोन दिवसांपूर्वी लोकसभेत घडलेल्या प्रकाराबद्दल ट्विटरवरून मोठा गौप्यस्फोट केला आहे. तसेच त्यांनी सत्ताधारी भाजपवर जोरदार हल्लाबोल केला. यावेळी शरद पवार यांनी अनेक विषयांना हात घालत आपली भूमिका स्पष्ट केली. (Sharad Pawar news in Marathi)

शरद पवार ट्विटमध्ये म्हणाले की, लोकशाहीत वेगवेगळी मत असतात. त्या मताशी शंभर टक्के तुम्ही सहमत होता, असे नाही. हे जरी खरे असले तरी मत ऐकण्याची भूमिका घ्यावी लागते. मात्र ते चित्र दिसत नाही. काही दिवसांपूर्वी काँग्रेस पक्षाच्या खासदारांकडून एक शब्द चुकीचा गेला ही चूक होती. चूक लक्षात आल्यावर त्यांनी याची माफी मागितली. मात्र हट्ट काय केला, तर जो बोलला त्याबद्दल कोणी काही बोलले नाही तर सोनिया गांधींनी माफी मागावी.

पवार पुढं म्हणाले की, विधान केलं दुसऱ्याने आणि माफी तिसऱ्याकडून मागता. त्याबाबतीत सभागृह थांबल्यावर , सोनिया गांधी यांनी एका भाजपच्या ज्येष्ठ महिला खासदारांना माझ्यावर हल्ला का होतोय, माझ्याकडून माफी का मागितली जातेय असे विचारण्यासाठी गेल्या तर त्यांच्या अंगावर सबंध सभासद धाऊन आले. अगदी मंत्रिमंडळात असलेले मंत्रीही धावून आले. यातून काही वेगळा प्रकार होण्याची शक्यता होती. सुदैवाने राष्ट्रवादीच्या खासदारांनी सोनिया गांधीना तिथून बाहेर काढले. हे झालं नसतं तर सदनामध्ये एक भीषण चित्र आपल्याला पाहायला मिळालं असतं. सबंध जगात भारताची नाचक्की झाली असती, असंही पवार यांनी म्हटलं.