पंढरपूर: राष्ट्रवादीचे सर्वेसर्वा शरद पवार यांनी राष्ट्रवादी काँग्रेस पक्षाच्या अध्यक्षपदाचा राजीनामा देण्याचा निर्णय घेतल्यानंतर भाजपचे खासदार सुजय विखे पाटील यांनी राष्ट्रवादीवर जोरदार निशाणा साधला आहे.

खासदार विखे-पाटील म्हणाले की, शरद पवारांच्या राजीनाम्यामुळे भाजप-सेनेच्या विरोधात तयार करण्यात आलेली महाविकास आघाडीची वज्रमूठ ढिली झाली आहे. राष्ट्रवादी काँग्रेसचे प्रदेश अध्यक्ष जयंत पाटील यांनी नैराश्यातून जे वक्तव्य केले आहे, त्यावरून ते ही राष्ट्रवादी सोडून जातील असे वाटते.

खासदार सुजय विखे-पाटील हे बुधवारी (ता.३) श्री विठ्ठल रुक्मिणी दर्शनासाठी पंढरपुरात आले होते. दर्शनानंतर पत्रकारांशी बोलताना त्यांनी राष्ट्रवादीवर टीकास्त्र सोडले.

यावेळी खासदार विखे-पाटील म्हणाले की शरद पवार यांचा राजीनामा ही त्यांच्या पक्षांतर्गत बाब आहे. जशी समुद्राची वाळू मूठीत घट्ट पकडल्यानंतर ती तितक्याच वेगाने ढिली होते. त्याप्रमाणे महाविकास आघाडी

वज्रमूठ म्हणजे समुद्रातील वाळू घट्ट धरल्यानंतर जशी हातातून निसटते तसा एक प्रकार आहे. राज्यात आणखी काही घडामोडी घडणार आहेत. त्यामुळे आताच त्यावर भाष्य करणे उचित होणार नाही. याविषयी उपमुख्यमंत्री देवेंद्र फडणवीस यांनी पक्षाची भूमिका मांडली आहे.

काँग्रेस नेते पृथ्वीराज चव्हाण यांनी अधिच राष्ट्रवादीचा निम्मा कार्यक्रम केला आहे. आता राहिलेला कार्यक्रम देखील ते करतील असा टोला ही खासदार विखे-पाटील यांनी राष्ट्रवादीला लगावला.

मंदिर समितीच्या वतीने खासदार सुजय विखे-पाटील यांचा सत्कार केला. यावेळी मंदिर समितीचे मुख्य कार्यकारी अधिकारी तुषार ठोंबरे, प्रांताधिकारी गजनन गुरव, तहसीलदार सुशील बेल्हेकर, गटविकास अधिकारी प्रशांत काळे, व्यस्थापक बालाजी पुदलवाड, प्रणव परिचारक आदी उपस्थित होते.