मुंबई: शिवसेनेचे खासदार संजय राऊत यांनी पत्रकारांशी बोलताना मोठं वक्तव्य केलंय. शिवसेना आता सीमोल्लंघन करुन राष्ट्रीय राजकारणाच्या केंद्रस्थानी असेल, असं महत्त्वाचं वक्तव्य त्यांनी दसऱ्याच्या पार्श्वभूमीवर केलंय. आजच्या दसरा मेळाव्याची तयारी पूर्ण झाली असून नियमांचं पालन करुनच मेळावा होईल, असं त्यांनी स्पष्ट केलंय. ते म्हणाले की, उद्धव ठाकरे या बोलतील याकडे सर्वांचं लक्ष आहे. शस्त्र कधी, कुणासाठी काढायची असतात हे सायंकळी ठाकरेंच्या भाषणात कळेल.

सरसंघचालक मोहन भागवत यांनी ओटीटी आणि ड्रग्जसंदर्भात केलेल्या वक्तव्यावर त्यांनी म्हटलंय की, नोटाबंदीनंतर मोदींचं वक्तव्य होतं की, नोटाबंदीमुळे दहशतवाद्यांना मिळणारा पैसा बंद होईल. आज चार वर्षानंतरही सरसंघचालक त्यावर चिंता व्यक्त करत आहेत. म्हणजे चिंतेची बाब आहे. सरसंघचालकांनी चिंता व्यक्त केलीय की ड्रग्जचा पैसा राष्ट्रविरोधी कारवायांसाठी वापरला जातो. या चिंतेशी आम्ही सहमत आहोत. सरकार भाजपचं आहे. मोदीचं आहे. ते जर रोखू शकत नाही तर कोण रोखणार? असा सवाल त्यांनी केलाय.

आम्ही राष्ट्रीय राजकारणाच्या केंद्रस्थानी असू

शिवसेना राष्ट्रीय राजकारणात सक्रिय आहेच. सध्या 21 खासदार आहेत आमचे आता 22 होतील. भविष्यामध्ये 2024 नंतर शिवसेना राष्ट्रीय राजकीय राजकारणाच्या केंद्रस्थानी असेल, असं ठाम वक्तव्य त्यांनी केलं आहे.