मुंबई : शिवसेनेकडून सत्ता स्थापनेसाठी जोरदार हालचाली सुरु झाल्या असून, शिवसेनेचे आमदार उदय सामंत यांनी सर्व आमदारांच्या सह्या घेण्यास सुरवात झाली आहे. 

'सकाळ'चे मोबाईल ऍप डाऊनलोड करा

मालाडमधील दी रिट्रीट हॉटेलमध्ये थांबलेल्या शिवसेनेच्या सर्व आमदारांना एकत्र येण्याचे आदेश सेनेने दिले आहेत. उदय सामंत यांनी आघाडी घेत सर्व आमदारांच्या सह्या घेतल्या आहेत. या सह्या नक्की कोणाच्या समर्थनार्थ आहेत, याबाबत उत्सुकता आहे. शिवसेनेकडे 56 आमदार असून, सत्ता स्थापनेत शिवसेना कोणाची मदत घेणार याकडे राज्याचे लक्ष लागले आहेत.  

भाजपची माघार; लक्ष शिवसेनेकडे

राज्यात सत्ता स्थापन करण्यासाठी भाजपने असमर्थता दर्शविल्याने राज्यपाल भगतसिंह कोशियारी यांनी आता शिवसेनेला सत्तास्थापनेसाठी निमंत्रण दिले आहे. त्यांना आज (ता. ११) सोमवार सायंकाळी साडेसात वाजेपर्यंतचा वेळ राज्यपालांनी दिला असून, तोपर्यंत सत्ता स्थापन करू शकणार का, हे शिवसेनेला राज्यपालांना कळवावे लागणार आहे. सत्तेत मुख्यमंत्रिपदाचे मानाचे पान मिळावे, यासाठी भारतीय जनता पक्षाच्या नाड्या आवळण्याचा प्रयत्न करणाऱ्या शिवसेनेसमोरची राजकीय आव्हाने वाढली आहेत.

शिवसेना 'एनडीए'तून बाहेर?; अरविंद सावंत यांचा राजीनामा

भाजपने शिवसेना सोबत नसेल, तर सत्तास्थापन करण्यास असमर्थता व्यक्त करीत धक्कातंत्रांचा वापर करीत शिवसेनेला सत्ता स्थापण्यासाठी ‘खो’ दिला आहे. विधानसभा निवडणुकीत भाजपच्या १०५ जागा निवडून आल्याने शिवसेनेने ५६ जागांच्या बळावर भाजपकडे अडीच वर्षांचे मुख्यमंत्रिपद मागितले. पण, त्यासाठी भाजप तयार तर झाला नाहीच; पण शिवसेनेची मनधरणी करण्याचा प्रयत्नही भाजपने केला नाही. भाजप सत्तास्थापनेसाठी दावा करेल आणि त्यानंतर त्यांच्याकडे शिवसेनेशिवाय पर्याय नसेल, असा शिवसेनेचा कयास होता. मात्र, तो पूर्णपणे फोल ठरला. दुसऱ्या बाजूला काँग्रेस आणि राष्ट्रवादीसोबत चर्चा करून भाजपवर दबाव वाढविण्याचाही प्रयत्न शिवसेनेकडून होत होता. मात्र, शिवसेनेची ही सगळीच गणिते फिस्कटल्याने शिवसेनेची आव्हाने वाढली आहेत.