मुंबई : शिवसेना खासदार आणि उद्धव ठाकरे यांच्या मर्जीतील नेते अशी ओळख असणाऱ्या संजय राऊत यांच्या घरावर अखेर सक्तवसुली संचलनालय अर्थात ईडीची धाड पडलीय. काहीवेळापूर्वीच संजय राऊत (Sanjay Raut) यांच्या मुंबईतील घरी ईडीच्या अधिकाऱ्यांचे पथक सीआरपीएफ जवानांच्या सुरक्षेसह दाखल झालं आहे. त्यानंतर ईडीनं याठिकाणी तपासाला सुरुवात केलीय.

याच पार्श्वभूमीवर संजय राऊत यांनी सूचक ट्विट करत ईडी कारवाईवर निशाणा साधलाय. राऊत यांनी ट्विटमध्ये लिहिलंय, खोटी कारवाई.. खोटे पुरावे असं सांगत राऊतांनी मी शिवसेना सोडणार नाही. मरेन, पण शरण जाणार नाही, असा इशाराही त्यांनी ईडीला दिलाय. कोणत्याही घोटाळ्याशी माझा काडीमात्र संबंध नाही. शिवसेना प्रमुख बाळासाहेब ठाकरे यांची शपथ घेऊन मी हे सांगत आहे. बाळासाहेबांनी आम्हाला लढायला शिकवलंय. मी शिवसेनेसाठी लढत राहीन, असंही त्यांनी ईडीला सुनावलंय.

ईडीनं यापूर्वी संजय राऊत यांना चौकशीला हजर राहण्यासाठी दोन समन्स बजावली होती. मात्र, संसदेच्या पावसाळी अधिवेशनाचे कारण देत संजय राऊत यांनी चौकशीला जाणं टाळलं होतं. त्यामुळं आता ईडीचे अधिकारी संजय राऊत यांच्या घरी पोहोचले आहेत. आता ईडीचे अधिकारी संजय राऊत यांना चौकशीसाठी आपल्या कार्यालयात नेणार का आणि त्यांना अटक करणार का, याकडं सर्वांच्या नजरा लागल्या आहेत.