सध्या राज्यसभेच्या निवडणुकीची जोरदार तयार राजकीय वर्तुळातून पहायला मिळत आहे. या निवडणुकीच्या पार्श्वभूमीवर घडामोडींनी वेग घेतला आहे. नेतेमंडळींच्या गाठीभेटी वाढल्या असल्याने निवडणुकीला रंगत चढली आहे. दरम्यान, असे असले तरीही महाविकास आघाडीतील अंतर्गत कुरबुरी बऱ्याचवेळा समोर येत असते. शिवसेना, राष्ट्रवादी काँग्रेस आणि काँग्रेस पक्षातील नेते आपल्या मित्रपक्षांवर टीका करताना दिसून येतात. (latest political news)

अहमदनगर जिल्ह्यातून अशीच एक बातमी समोर येत आहे. शिवसेना खासदार गजानन कीर्तिकर (Gajanan Kirtikar) यांनी राष्ट्रवादीचे आमदार रोहित पवार (Rohit Pawar) यांच्यावर निशाणा साधत इशाराही दिला आहे. शिवसेनेच्या कार्यकर्त्यांवर आमदार रोहित पवार यांनी दबाव टाकण्याचे धंदे बंद करावेत, असं इशारा खासदार गजानन किर्तिकर यांनी दिला आहे.

यावेळी खासदार कीर्तिकर म्हणाले, राज्यात महाविकास आघाडी करण्यात आमदार रोहित पवार यांचे आजोबा शरद पवार यांचे मोलाचे योगदान आहे. पवार कुटूंबाला मोठी परंपरा असून त्याची जान राजकारण करताना ठेवण्याची गरज आहे. त्यामुळे रोहित पवार यांनी कार्यकर्त्यांवर दबाव आणणे बंद करावे, असंही त्यांनी सुनावलं आहे. अहमदनगर जिल्हा शिवसंपर्क अभियानासाठी खासदार कीर्तिकर हे अहमदनगर जिल्हा दौऱ्यावर आहेत. यानिमित्त ते कर्जत येथे बोलत होते.

पुढे ते म्हणाले, आमदार पवार यांनी आघाडीचा धर्म पाळत मतदारसंघांमध्ये शिवसैनिकांना आणि पदाधिकार्‍यांना विश्वासात घेऊन वाटचाल करावी. जिल्हा नियोजन समितीच्या निधीमध्ये शिवसेनेला वाटा देण्यात यावा. त्याचप्रमाणे मतदारसंघामध्ये होणार्‍या विकास कामांमध्ये शिवसैनिकांना सहभागी करून घ्यावे. शिवसेना पदाधिकार्‍यांनी ज्या तक्रारी केल्यात, यावरून या ठिकाणी परिस्थिती गंभीर होत असल्याचे दिसून येत आहे. त्यांनी आघाडीचा धर्म पाळावा अन्यथा शिवसैनिक ही बांधिल राहणार नाहीत असा इशाराच शिवसेनेचे खासदार गजानन किर्तिकर यांनी दिला आहे.