मुंबई : आज शिवसेनेचे मुखपत्र असलेल्या सामन्यातून शिवसेनेचे शिरूर लोकसभा मतदारसंघातील माजी खासदार शिवाजीराव आढळराव पाटील (Shivajirao Adhalrao Patil) यांची पक्षातून हकालपट्टी करण्यात आल्याचं वृत्त प्रसिद्ध झालं आणि राज्याच एकच खळबळ उडाली. त्यानंतर शिवसेनेने प्रसिद्धीपत्रक काढून ही बातमी अनावधानाने छापली असल्याचा खुलासा केला आहे. त्यांनी नवे मुख्यमंत्री एकनाथ शिंदे यांना शुभेच्छा दिल्या या कारणावरून त्यांना काढून टाकल्याची माहिती होती. या घटनेनंतर माजी खासदार शिवाजीराव आढळराव पाटील यांनी पत्रकार परिषद घेऊन नाराजी व्यक्त केली होती.

(CM Uddhav Thackeray Phone Call to Shivajirao Adhalrao Patil)

या सर्व प्रकारानंतर माजी मुख्यमंत्री उद्धव ठाकरे यांनी शिवाजीराव आढळराव पाटील यांना फोन करून झाल्या प्रकाराबद्दल हळहळ व्यक्त केली आहे. यासंदर्भात शिवाजीराव आढळराव पाटील म्हणाले की, मुख्यमंत्र्यांनी मला फोन केला आणि झाल्या प्रकाराबद्दल हळहळ व्यक्त केली आहे पण राज्यभर माझी बदनामी झाली त्याचं काय?" अशी प्रतिक्रिया आढळराव यांनी दिली आहे. दरम्यान आज दिवसभर मी विचार करणार आहे. झाल्या प्रकाराबद्दल उद्धव ठाकरे यांना भेटणार आहे. त्यानंतर पुढचा निर्णय ठरवला जाईल अशा सूचक इशाराही त्यांनी दिला आहे.

हकालपट्टीच्या बातमीनंतर पत्रकार परिषदेत बोलताना ते म्हणाले की, मी कित्येक वर्षे राष्ट्रवादीच्या उमेदवाराविरूद्ध लढलो. गेल्या अडीच वर्षापासून मी त्यांना अंगावर घेत आलोय आता फक्त गोळ्या मारायच्याच बाकी आहेत. शरद पवारांनी मला लोकसभा न लढण्यासाठी ऑफर दिली होती पण मी बाळासाहेबांच्या विचारावर ठाम राहिलो. आणि आज माझी काही चुकी नसताना काही कारण नसताना मला पक्षातून काढून टाकण्यात आलंय. यासाठी काहीतरी कारण तरी द्यायचं. अशी नाराजी त्यांनी व्यक्त केली होती पण या प्रकारानंतर शिवसेनेने पत्रक काढून खुलासा करत ही बातमी अनावधानाने छापली असल्याचं सांगितलं आहे. दरम्यान यानंतर उद्धव ठाकरे यांनी त्यांनी फोन करून हळहळ व्यक्त केली आहे.