व्हीप नाकारल्याने शिवसेनेकडून(शिंदे गट) ठाकरे गटाच्या ४ खासदारांना नोटीस पाठवण्यात /येणार आहे. शिंदे गटाच्या प्रतोद भावना गवळी यांच्याकडून ठाकरे गटाला नोटीस पाठवली जाणार असल्याची माहिती समोर आली आहे. ठाकरे गटाचे खासदार विनायक राऊत, राजन विचारे, संजय जाधव आणि ओमराजे निंबाळकर या खासदारांना भावना गवळी यांच्याकडून नोटीस पाठवण्यात येणार आहे.

विशेष आधिवेशन काळात ठाकरे गटाच्या खासदारांनी व्हीप नाकारल्याचा ठपका त्यांच्यावर ठेवण्यात आला आहे. महिला आरक्षण विधेयकावेळी ठाकरे गटाच्या ४ खासदारांचा गैरहजेरी होती. त्याच पार्श्वभूमीवर शिंदे गटाने ठाकरे गटाला कोंडीत पकडण्याचा प्रयत्न सुरू केला आहे.

महिला आरक्षण विधेयकाला पाठिंबा न देण्याच्या कृतीवर ठाकरे गटाच्या खासदार विनायक राऊत, ओमराजे निंबाळकर, राजन विचारे आणि संजय जाधव यांना नोटीस पाठवून कारवाई केली जाईल, असं शिंदे गटाने पत्रद्वारे सूचित केले आहे.

शिवसेना शिंदे गटाच्या लोकसभेच्या प्रतोद भावना गवळी यांनी संसदेच्या विशेष अधिवेशनासाठी १४ सप्टेंबर रोजी व्हीप काढला होता. महिला आरक्षण विधेयकाच्या बाजूने शिवसेना खासदारांनी मतदान करावं, असं भावना गवळी यांनी व्हीपद्वारे म्हटलं होतं. परंतू ठाकरे गटाचे खासदार विनायक राऊत, राजन विचारे, ओमप्रकाश निंबाळकर, संजय जाधव हे हजर राहिले नसल्यामुळे त्यांनी या विधेयकाच्या बाजूने मतदान केलेले नाही. त्यामुळे शिंदे गटाने यासंदर्भात कायदेशीर बाजू तपासण्यास सुरुवात केली आहे.

दरम्यान या चारही खासदारांना एक नोटीस पाठवण्यात येणार असल्याची माहिती शिंदे गटाने एका पत्रकाद्वारे दिली आहे. विशेष म्हणजे, ठाकरे गटाचे पक्षप्रमुख उद्धव ठाकरे यांनी अद्याप यासंदर्भात भूमिका जाहीर केलेली नाही.