राष्ट्रवादी काँग्रेसचे नेते अजित पवार पक्षात बंडखोरी करणार असल्याच्या चर्चांना काल उधाण आलं. एका इंग्रजी वृत्तपत्राने दिलेल्या वृत्तानंतर राजकीय वर्तुळात अनेक तर्क-वितर्क लावले गेले. मात्र, त्यानंतर अजित पवारांनी, “या बातम्यांमध्ये काहीही तथ्य नाही”, असं स्पष्टीकरण काल पत्रकार परिषद घेत दिलं आहे.

दरम्यान, यावरून आता शिवसेनेचे नेते आणि मंत्री गुलाबराव पाटील यांनी मिश्किल टीका केली आहे. ते बोलताना म्हणाले की, "मला वाटतं अजून तिथी जवळ आलेली नाही. गुणही जुळत नाही. त्यामुळे कोणती पुजा करावी लागले, हे एखाद्या ब्राम्हणाला विचारायला लागेल. पण वेळ येईल काळजी करू नका," अशी प्रतिक्रिया गुलाबराव पाटील यांनी दिली आहे.

तसेच अजित पवारांच्या भाजपा प्रवेशाचा मुहूर्त खरंच ठरला आहे का? असं विचारल्यानंतर ते म्हणाले की, 'ही वेळी लवकरच येईल. दोघांची इच्छा आहे. पण गुण जुळत नसल्याचं ब्राम्हणाचं म्हणणं आहे,' असं ते म्हणालेत.

अजित पवारांनी भाजपमध्ये प्रवेश करण्याच्या चर्चेवर दिलं स्पष्टीकरण

दरम्यान, अजित पवार यांनीही काल याबाबत स्पष्टीकरण दिलं. “राष्ट्रवादी पक्षाची स्थापना स्वाभिमानातून झाली आहे. १० जूनला १९९९ पासून आम्ही काम करत आहे. आजही आम्ही काम करतोय, उद्याही करत राहणार. जोपर्यंत आमच्या जिवात जीव आहे, तोपर्यंत आम्ही पक्षाचं काम करत राहणार”, असं ते म्हणाले होते.

त्याचबरोबर “या बातम्या विपर्यास करून दाखवल्या जातात. अशा चर्चा सुरू झाल्याने जवळचे कार्यकर्ते नाराज होतात. संभ्रामवस्थेत जातात. परंतु, यात काहीही तथ्य नाही. प्रत्येकाने आपआपलं काम करा, महाविकास आघाडी बळकट होण्याकरता प्रयत्न करा”, असं आवाहन त्यांनी कार्यकर्त्यांना केले आहे.