मुंबई : शिवसेनेच्या एकनाथ शिंदे गटासोबत गेलेल्या १२ खासदारांनी आज पत्रकार परिषद घेतली. या परिषदेत खासदार राहुल शेवाळे यांनी युतीबाबत एकामागून एक गौप्यस्फोट करत चार ते पाच वेळा शिवसेना-भाजप युतीसाठी प्रयत्न झाले पण प्रत्येक वेळी अपेक्षित प्रतिसाद न मिळाल्यानं ती होऊ शकली नाही, असा दावा शेवाळे यांनी केला, त्यानंतर शिवसेना नेते संजय राऊत यांनी त्याला जोरदार प्रत्युत्तर दिलं आहे.

संजय राऊत म्हणाले की, उद्धव ठाकरे सगळ्या गोष्टी सहकाऱ्यांना विश्वासात घेऊन सांगतात, त्यामुळे मविआच्या वेळीही, ही आघाडी कोणत्या परिस्थितीत करतोय ते त्यांनी सर्वांना विश्वासात घेऊन सांगितलं होतं, असे संजय राऊत म्हणाले. या प्रयोगाचं स्वागत सर्वांनी केलं होतं. नरेंद्र मोदी आणि उद्धव ठाकरे यांच्यात बंद खोलीत झालेल्या चर्चेचा काही भाग त्यांनी आम्हा सर्वांना सांगितला आहे. राजकारणात उलथापालथ झाली तरी मोदी आणि ठाकरे यांच्यातील नातं कायम राहीलं असे राऊत म्हणाले. ज्यांनी गोप्यस्फोट केला त्यांना मोदींनी सांगितलं असेल, त्यावर फाव विश्वास ठेऊ नका असे राऊत म्हणाले.

राऊत पुढे म्हणाले, मला त्या सगळ्यांना प्रश्न विचारायचा आहे की हे सगळे २०१४ मध्ये कुठे होते. भाजपने जेव्हा हिंदूत्वाची युती तोडली तेव्हा यापैकी किती जणांनी भाजपच्या भूमिकेवर प्रश्न उपस्थित केले? आम्हाला युती हवी होती, आम्ही शेवटपर्यंत प्रयत्न करत होतो. भारतीय जनता पक्षानेच २१४ साली युती तोडली आणि २०१९ साली देखील युती भाजपमुळेच तुटली. त्यामुळे त्यावर आता कोणी काही बोलत असतील तर त्याला अर्थ नाही, असे संजय राऊत म्हणाले.

राहुल शेवाळे म्हणाले होते की, यावेळी उद्धव ठाकरेंनी आम्हाला सांगितलं की, मला पण युती करायची आहे. मी यासाठी मी खूप प्रयत्न केला, पण जेव्हा मी पंतप्रधान मोदींना दिल्लीला भेटायला गेलो तेव्हा या भेटीत या गोष्टीचा उल्लेख केला. पण त्यानंतर जूनमध्ये ही बैठक झाल्यानंतर जुलैमध्ये अधिवेशनात १२ भाजपच्या आमदारांवर निलंबनाची कारवाई केली. पण त्यावेळी भाजपच्या वरीष्ठ नेतृत्वाला वाटलं की, एकीकडे आपल्याशी युतीचं बोलणं होत आणि दुसरीकडं बारा आमदारांवर कारवाई होते. त्यामुळं भाजपच्या पक्षश्रेष्ठींकडून नाराजी झाली. त्यामुळं कित्येक वेळा चर्चा झाल्यानंतरही पॉझिटिव्ह प्रतिसाद न मिळाल्यानं भाजपचे पक्षश्रेष्ठी नाराज होते. आता मी माझ्याकडून अनेकदा युतीसाठी प्रयत्न केले आणि तुम्ही तुमच्याकडून प्रयत्न करुन पाहा, असंही उद्धव ठाकरेंनी आम्हाला सांगितलं. यानंतर मी चार पाच खासदारांना घेऊन एकनाथ शिंदे आणि भाजपच्या नेत्यांना भेटलो. पण आवश्यक प्रतिसाद न मिळाल्यानं ती झाली नाही, असं खासदार राहुल शेवाळे यांनी पत्रकार परिषदेत सांगितलं.