शिवसेना आमदार अपात्रतेच्या सुनावणीचं वेळापत्रक काही दिवसांपुर्वी समोर आलं आहे. आता शिवसेना कोणाची? हे ठरवण्यासाठी विधीमंडळाच्या कार्यवाहीला वेग आल्याचे दिसून येत आहे. शिवसेना कोणाची? ठरवण्यासाठी योग्य पुरावे सादर करा, असे म्हणत विधीमंडळ सचिवांनी एकनाथ शिंदे- उध्दव ठाकरे यांना नोटीस पाठवली आहे.

१३ ऑक्टोबर ते २३ नोव्हेंबर दरम्यान विधानसभा अध्यक्ष राहुल नार्वेकर यांच्यासमोर ठाकरे गट आणि शिंदे गट यांचा युक्तिवाद चालणार आहे. अशात पुरावे सादर करण्यासाठी दोन्ही गटांकडे फक्त एका आठवड्याची मुदत शिल्लक राहिली आहे.

शिवसेना शिंदे गट आणि ठाकरे गट या दोन्ही गटांना आपले वर्चस्व सिद्ध करण्याची ही संधी असणार आहे. निवडणूक आयोगाच्या निर्णयानंतर आता विधीमंडळाच्या निर्णयाकडे या दोन्ही गटांसह राज्याचं लक्ष लागलं आहे. शिंदे-ठाकरेंना उत्तर देण्यासाठी आठ दिवसांची मुदत शिल्लक आहे.

दरम्यान या संपुर्ण प्रकरणावर बोलताना विधानसभा अध्यक्ष राहुल नार्वेकर म्हणाले की, निवडणूक आयोग ही स्वायत्त संस्था आहे त्यांच्या कार्यपद्धती वर संशय घ्यायची गरज नाही, असं राहुल नार्वेकर म्हणालेत तर कायदा पाळून सगळे निर्णय घेतील जातील. संविधानिक शिस्त पाळली जाईल, सभागृहाच्या बाहेरून होणाऱ्या आरोपामुळे कधीच प्रभावित होत नाही आणि माझ्या निर्णयावर काही त्याचा फरक होणार नाही, असंही नार्वेकरांनी यावेळी स्पष्ट केलं आहे.