शिवसेनेतल्या ऐतिहासिक बंडानंतर आता पक्ष सावध भूमिकेत आहे. राहिलेल्या आमदारांची मनधरणी, रस्त्यावर उतरुन आक्रमक भूमिका घेणं अशी मोहीम आता सेना राबवताना दिसत आहे. अशातच आता शिवसेना पक्षप्रमुख उद्धव ठाकरे यांनी आमदारांना भावनिक पत्र लिहित त्यांचे आभार मानले आहेत. (Uddhav Thackeray Latest News)

एकनाथ शिंदेंच्या (Eknath Shinde) ऐतिहासिक बंडानंतर ४० आमदार शिंदे गटात गेले. आणखी आमदार त्यांच्या गटात जाण्याच्या चर्चा कानावर पडत आहेत. अशातच आपल्यासोबत शिल्लक राहिलेल्या आमदारांना धरुन ठेवण्याचा एक भावनिक प्रयत्न उद्धव ठाकरेंनी (Uddhav Thackeray) केलेला दिसून येत आहे. आज सर्वोच्च न्यायालयात सुनावणी होणार आहे. त्याआधीच उद्धव ठाकरेंनी सोबत राहिलेल्या आमदारांना भावनिक साद घातली आहे. आपल्या अडचणीच्या आणि संकटाच्या काळात साथ दिल्याबद्दल त्यांचे आभारही मानले आहेत. (Shiv Sena News)

या पत्रात म्हटलं आहे की, शिवसेना आपला परिवार आहे. आजही वंदनीय हिंदुहृदयसम्राट शिवसेनाप्रमुख बाळासाहेब ठाकरे (Balasaheb Thackeray) हेच आपलं सर्वस्व आहे. निष्ठा आणि अस्मितेची महती आपल्याला बाळासाहेबांनी शिकवली आहे. शिवसेनेचे आमदार म्हणून आपण निष्ठेचं पालन केलंत. वंदनीय बाळासाहेबांच्या विचारांचे पाईक असल्याचं आपण दाखवून दिलंय. आपण निष्ठेने शिवसेनेबाबत राहिलात. आपल्या भूमिकेमुळे महाराष्ट्राला अभिमान वाटला आणि शिवसेनेला बळ मिळालं, असंही पत्रात म्हटलं आहे.