मुंबई - केंद्रीय निवडणूक आयोगाने शिवसेना पक्षाचे नाव आणि धनुष्यबाण चिन्ह एकनाथ शिंदे गटाला दिले आहे. त्यानंतर प्रथमच शिंदे गटाने अधिकृत शिवसेना पक्षाची कार्यकारणीची बैठक घेतली. या बैठकीत एकनाथ शिंदे यांची शिवसेनेच्या मुख्य नेतेपदी निवड झाली आहे. यावेळी शिवसेना भवन आणि पक्षाच्या अकाउंटवर हक्क सांगण्याबाबतची भूमिक स्पष्ट केली.

शिवसेनेचे नेते आणि मंत्री उदय सामंत यांनी सांगितलं की, निवडणूक आयोगाने घालून दिलेल्या नियमावलीनुसारच सर्व निर्णय झाले. घटनेला अनुसरूनच एकनाथ शिंदे यांनी कार्यकारणीला संबोधित केलं.

दरम्यान कोणाच्याही संपत्तीवर आणि अकाऊंटवर आम्ही अधिकार सांगणार नसल्याचं एकनाथ शिंदे यांनी स्पष्ट केलं आहे. आम्ही बाळासाहेबांचा विचार घेऊन पुढं चालल्याचं शिंदे यांनी स्पष्ट केल्याची माहिती सामंत यांनी माध्यमांना दिली आहे. त्यामुळे शिंदे गट शिवसेना भवन आणि शिवसेना पक्षाच्या अकाउंटवर हक्क सांगणार असल्याचं स्पष्ट झालं आहे.

शिवसेनेच्या कार्यकारिणीमध्ये आज अनेक महत्त्वाचे ठराव झाले. यामध्ये मुख्यमंत्री एकनाथ शिंदे मुख्य नेतेपदी कायम आहे. त्यामुळे पक्षाचे सर्वाधिकार शिंदे यांच्याकडे देण्यात आले. यावेळी मराठी अभिजात भाषेचा दर्जा देण्याचा ठराव झाला. ८० टक्के भूमिपुत्रांना नोकरी देण्याचा ठरावही करण्यात आला. तसेच वि.दा. सावरकर यांना मरणोपरांत भारतरत्न देण्याचा ठरावही घेण्यात आला.