आज पुणे शहरातील चांदणी चौकाच्या लोकार्पणाचा कार्यक्रम पार पडला. या कार्यक्रमात बोलताना केंद्रीय मंत्री नितीन गडकरी यांनी उपमुख्यमंत्री देवेंद्र फडणवीस यांचं कौतुक केलं आहे. देवेंद्र फडणवीस मुख्यमंत्री होते तेव्हा त्यांनी महत्त्वाचा निर्णय घेतल्याचे गडकरी म्हणाले आहेत.

पुढे गडकरी म्हणाले की, मी म्हणालो होतो, जमीन अधिग्रहण मला करता येत नाही, हजार कोटींचा पूल लागला तर मी बांधून देईल. जमीन अधिग्रहणांची कामे आडली होती, त्यानंतर फडणवीसांनी नगरोत्थान नावाचं एक हेड काढलं, त्यानंतर सोलापूर, नागपूर, पुणे या भागात जमीन अधिग्रहण आणि शिफ्टिंगची कामे आडली होती, ती कामे फडणवीसांनी सुरू करून दिली, असं सांगतानाच गडकरींनी यावेळी फडणवीसांचे आभार देखील मानले आहेत.

तीन पैकी दोन गोष्टी पूर्णत्वास गेल्याचा आनंद

'ज्या तीन गोष्टी करण्याची मागणी पुणेकरांची होती त्यातील दोन गोष्टी पूर्णत्वास गेल्याचा आनंद आहे. एअरपोर्ट काम पूर्ण झाले आहे, चांदणी चौक पुलाचे काम पूर्ण झाले आहे, मेट्रोचेही काम लवकरच पूर्ण होईल. त्यामुळे या गोष्टीचा आनंद आहे', असं नितीन गडकरी म्हणालेत.

पुण्यात हवेतून चालणाऱ्या बसेस आणण्याचा विचार : नितीन गडकरी

पुणे शहर दिवसेंदिवस झपाट्याने वाढत आहे. वाढत्या लोकसंख्येबरोबरच पुण्यातील वाहनांची संख्या देखील वाढली आहे. पुणेकरांची वाहतूक कोंडीमधून सुटका होण्यासाठी हवेतून चालणाऱ्या बसचा वापर करण्याचा विचार असल्याचे केंद्रीय मंत्री नितीन गडकरी यांनी सांगितले आहे. यावेळी गडकरी यांनी पुण्यातील प्रदूषण कमी करण्यासाठी तसेच कचरामुक्त पुणे करण्यासाठी उपाय सुचवले आहेत. पुण्याला मोकळा श्वास घेऊ द्या, असंही गडकरी यावेळी बोलताना म्हणाले आहेत.