सोलापूर : मागील अनेक वर्षांपासून राजकारणी लोकांना आम्ही मतदान स्वरूपाने निवडून देतो. मात्र हेच राजकारणी आज आमच्या जीवावर उठले आहेत. कारण "एसटी' यांना समजली नाही तर कर्मचाऱ्यांच्या भावना काय समजणार आहेत? अशा तीव्र भावना सोलापूर एसटी डेपोतील क्‍लार्क बलभीम पारखे यांनी भाजपचे प्रदेशाध्यक्ष चंद्रकांत पाटील यांच्यासमोर आपल्या अश्रूंद्वारे मांडली.

बलभीम पारखे यांनी 'सकाळ'शी बोलताना आपल्या भावना व्यक्त केल्या. ते म्हणाले, कॉंग्रेस, राष्ट्रवादी कॉंग्रेस यांनी सातत्याने आश्वासने दिली आहेत, मात्र कोणत्याही एसटी कर्मचाऱ्याच्या मागण्या मान्य केलेल्या नाहीत. काँग्रेसने शासकीय कर्मचाऱ्यांप्रमाणे वेतन देण्याचे घोषित केले होते. मात्र अद्यापही त्यांना ते जमले नाही. त्यामुळे विश्वास कोणावर ठेवावा, हा प्रश्न कर्मचाऱ्यांसमोर आहे. कामगारांच्या मागण्या युनियनमार्फत सरकारपुढे मांडल्या जाव्यात, याच हेतूने एसटी कर्मचारी युनियनच्या पदाधिकाऱ्यांना निवडून देतात. मात्र युनियनचे पदाधिकारी सरकारला विकले गेलेत. हीच भावना माझ्या मनात मला सतावत होती, असह्य वेदना होत होत्या. त्यामुळे मला अश्रू अनावर झाल्या.

बलभीम पारखे पुढे म्हणाले, माझ्यासारख्या 29 एसटी कर्मचाऱ्यांच्या संसाराची राखरांगोळी झाली आहे. हीच भावना मी माझ्या अश्रूंद्वारे भाजपचे प्रदेशाध्यक्षांसमोर मांडत होतो. क्‍लार्क या पदावर काम करीत आहे. तरीही मला मूळ पगार 19 हजार, मात्र केवळ हातात येतात आठ हजार रुपये. मी कसा संसाराचा गाडा चालवू, हा प्रश्‍न मला सातत्याने सतावतोय. कुटुंबामध्ये आई, आजी, पत्नी, मुलगी असा परिवार आहे. आम्ही आमच्या हक्कासाठी भांडतो मात्र सरकार पोलिस प्रशासनाला पुढे करत एसटी कर्मचाऱ्यांवर दबाव टाकत आहे. मात्र जोपर्यंत आमच्या मागण्या मान्य होणार नाहीत, तोपर्यंत आम्ही मागे हटणार नाही. त्यामुळे दादा, तुम्हीच आमचे कैवारी आहात, त्यामुळे आमच्या मागण्या विधानसभेत व लोकसभेत मांडून आम्हाला न्याय द्या, हीच तुमच्याकडे कर्मचाऱ्यांच्या वतीने अपेक्षा करतो.