राज्यातील आघाडी सरकारने आत्मचिंतन करावे. बहुमत नसेल तर महाविकास आघाडीनं योग्य तो निर्णय घ्यावा, असा सल्ला भाजप नेते सुधीर मुनगंटीवार यांनी दिला आहे. यावेळी माध्यमांशी बोलताना त्यांनी शिवसेना खासदार राऊत यांच्यावरही टीकेची झोड उठवली आहे. खासदार राऊतांच मन अस्थिर झाल्यानं ते टीका करत आहेत, असंही त्यांनी स्पष्ट केलं आहे. आज ते नागपूर येथे बोलत होते. (sudhir mungantiwar on sanjay raut)

राज्यपाल कोश्यारी यांच्यासंदर्भात सवाल केला असता, ते म्हणाले, कोणतही पत्र दिल्यानंतर त्यासंदर्भात महाराष्ट्राच्या प्रशासनाकडून खुलासा आणि माहिती करुन घेणं हे राज्यापालांचे कर्तव्य आहे. (maharashtra politics) त्यामुळे इतर कोणताही प्रश्न उपस्थित होत नाही. महाराष्ट्रातील सध्याची परिस्थिती अस्थिर असताना काही लोक जीआर काढून पैसे कमवण्याचे काम करत आहेत, अशी शंका आल्याने हे पत्र दिले आहे. त्यामुळे राज्यपालांनी राज्यसरकारच्या निर्णयाची माहिती घेणे योग्यच आहे, असं त्यांनी स्पष्ट केलं आहे.

देवेंद्र फडणवीसांना राऊतांनी दिलेल्या सल्ल्यावर मुनगंटीवार म्हणाले की, राऊतांनी केलेल्या वक्तव्यावर भाष्य करण्याची गरज नाही. महाराष्ट्रात अस्थिरता वाढेल तसे राऊतांचे मनही अस्थिर होणार आहे, त्यामुळे ते काय बोलतील याची कल्पना नाही. पुढील काही दिवस राज्याच्या राजाकारणात राऊतांकडून अनेक नवीन शब्द ऐकायला मिळतील, असा टोला त्यांनी लगावला आहे. महाराष्ट्राच्या जनतेचं नुकसान होऊ नये, अशा अस्थिर परिस्थितीत प्रगत महाराष्ट्रासाठी भाजप निश्चितपणे वेट अॅंड वॉच या भूमिकेत असल्याचंही ते म्हणाले आहेत.