शिवसेनेच्या आमदार अपात्र प्रकरणातील घडामोडी सध्या राज्याच्या राजकारणात चर्चेचा विषय ठरत आहेत. मुख्यमंत्री एकनाथ शिंदे यांच्यासह १६ आमदार अपात्रा प्रकरणाची सुनावणी आता पुन्हा एकदा महिनाभरासाठी पुढे ढकलण्यात आल्याची माहिती आहे. येत्या ९ ऑक्टोबर रोजी सुप्रीम कोर्टात या प्रकरणाची सुनावणी होणार होती. मात्र, आता ही सुनावणी ३ नोव्हेंबरपर्यंत पुढे ढकलण्यात आल्याची माहिती आहे.

यापूर्वी ही सुनावणी 9 ऑक्टोबरला पार पडणार होती. सलग चौथ्यांदा आमदार अपात्रतेची सुनावणी लांबणीवर गेली आहे. आधी सर्वोच्च न्यायालयाकडून या प्रकरणावरील सुनावणीसाठी आधी 3 ऑक्टोबर, नंतर 6 ऑक्टोबर आणि त्यानंतर आता 9 ऑक्टोबर वरून आता थेट 3 नोव्हेंबर तारीख देण्यात आलेली आहे.

आमदार अपात्र प्रकरणाची सुनावणी पुढे ढकलण्याची ही या महिनाभरातील चौथी वेळ आहे. याआधी तीनवेळा या प्रकरणाची सुनावणी पुढे ढकलण्यात आलेली आहे. १६ आमदार अपात्रता प्रकरणाची सुनावणी लवकरात लवकर व्हावी, यासाठी ठाकरे गट आग्रही आहे. मात्र, सुनावणी पुन्हा एकदा पुढे ढकलण्यात आल्याने ठाकरे गटाला हा धक्का मानला जात आहे.

मुख्यमंत्री एकनाथ शिंदे यांच्यासह ४० आमदारांनी बंड केल्यानंतर ठाकरे गटाने सुप्रीम कोर्टात धाव घेतली. आमदार अपात्रतेसंबधीची याचिका दाखल केली होती. कोर्टाने यावर सुनावणी घेत १६ आमदार अपात्रतेचं प्रकरण विधानसभा अध्यक्षांकडे सोपवण्यात आलं आहे. त्यासंबधीही सुनावणी सुरू आहे.

मात्र, विधानसभा अध्यक्ष राहुल नार्वेकर हे वेळकाढूपणा करत असल्याचा आरोप करत ठाकरे गटाने सुप्रीम कोर्टात याचिका दाखल केली. या याचिकेवर सुनावणी घेताना कोर्टाने विधानसभा अध्यक्षांना फटकारलं त्यानंतर ३ ऑक्टोबर रोजी या प्रकरणाची सुनावणी घेण्याचं कोर्टाकडून सांगण्यात आलं.

आमदार अपात्रता प्रकरणाच्या सुनावणीसाठी निश्चित करण्यात आलेलं वेळापत्रक

13 तारखेला सर्व याचिका एकत्र करायच्या की नाही यावर सुनावणी

13 ते 20 ऑक्टोबर दरम्यान दोन्हीही गटांनी एकमेकांना दिलेली कागदपत्रांची विधिमंडळ तपासणी करणार

20 ऑक्टोबर रोजी सर्व याचिका एकत्रित करायच्या की नाही यावर निकाल दिला देणार

20 ऑक्टोबरला काही अधिकची कागदपत्रे एखाद्या गटाला सादर करायची असतील तर त्यासाठी संधी दिली जाणार

27 ऑक्टोबरला दोन्हीही गट आपापलं म्हणणं ( स्टेटमेंट) मांडणार

6 नोव्हेंबरपर्यंत दोन्ही गट आपली बाजू मुद्देसूद मांडतील. त्यानंतर दावे आणि प्रतिदावे करतील

10 नोव्हेंबरला दोन्ही गटांनी मांडलेल्या मुद्द्यांच्या अनुषंगाने सुनावणी पार पडणार

20 नोव्हेंबरला दोन्ही गटांच्या साक्षीदारांची यादी सादर केली जाणार

23 नोव्हेंबरला साक्षीदारांची उलट साक्ष घेतली जाणार

सर्व पुरावे तपासल्यानंतर पुढील दोन आठवड्यात अंतिम सुनावणी पार पडणार