शिवसेनेच्या ठाकरे गटाचे नेते सचिन अहिर यांनी बंडखोर आमदार बच्चू कडू यांचं कौतुक केलं आहे. एका कार्यक्रमात बोलताना सचिन अहिर म्हणाले की, मी बच्चू कडू यांचं जाहीर अभिनंदन करतो. खोके मिळाले नाही मिळाले हे मला माहिती नाही. मी त्यामध्ये जाऊ इच्छित नाही. ते माझे चांगले मित्र आहेत. पण या सत्तांतरानंतर किमान त्यांनी प्रहार संघटनेच्या माध्यमातून दिव्यांगांसाठी स्वतंत्र मंत्रालय हवं अशी अनेक वर्षांची त्यांची मागणी होती आणि त्यांनी ती मागणी मंजूर करून घेतली त्याबद्दल मी या व्यासपीठावर त्यांचं जाहीर कौतुक करतो असं आहीर म्हणाले आहेत.

जे चांगलं आहे तर चांगलं बोलायला आपण पुढे मागे पहिलं नाही पाहिजे. बच्चू कडू जर सूरत, गुवाहाटीला गेले नसते तर कदाचित हा विभाग झाला नसता असंही आहीर म्हणाले आहेत. सचिन आहीर यांच्याकडून बंडखोर आमदार बच्चू कडू यांचं कौतुक केल्यामुळे आणि त्यांच्या वक्तव्यामुळे राजकीय नेत्याच्या भुवया उंचावल्या आहेत.

दरम्यान एकनाथ शिंदे आणि 40 समर्थक आमदार यांनी बंड केल्यानंतर त्यांच्यावर कायमच टीका केली जाते. परंतु कडू यांच्या दिव्यांगांसाठी स्वतंत्र मंत्रालय या मागणीमुळे विरोधकही त्यांचं कौतुक करत असल्यामुळे अनेकांच्या भुवया उंचावल्या आहेत. दिव्यांगांसाठी स्वतंत्र मंत्रालय स्थापन व्हावं म्हणून आमदार बच्चू कडू अनेक वर्षांपासून संघर्ष करत आहेत. अखेर त्यांच्या लढ्याला आज यश आलं आहे.