मुंबई : महाराष्ट्रातील सर्व जिल्ह्यांमध्ये तिसऱ्या गटाचे नियम लागू होणार आहेत. सरकारने जारी केलेल्या नियमावलीमध्ये महत्त्वपूर्ण बदल करण्यात आले आहेत. राज्य सरकारचे नियम आज बदलण्यात आले आहेत. महाराष्ट्रातील सर्व जिल्ह्यांमध्ये तिसऱ्या गटाचे नियम लागू होणार आहेत. राज्यात पाच लेव्हलमध्ये जिल्ह्यांना निर्बंध लागू करण्यात आले होते. मात्र, आता तिसऱ्या लेव्हलचे निर्बंध सगळ्या जिल्ह्यांना लागू राहणार आहेत. यानुसार राज्यातील सर्व जिल्हे आणि महानगरपालिकांचा समावेश तिसऱ्या गटाच्या वरच ठेवण्यासंदर्भात निर्णय घेण्यात आला आहे. डेल्टा प्लस हा नवा व्हेरियंट सध्या धूमाकूळ घालत असल्याच्या पार्श्वभूमीवर हा निर्णय घेतला गेला असल्याची शक्यता आहे. महाराष्ट्रात आज या व्हेरियंटमुळे एका रुग्णाचा मृत्यू झाला आहे.

राज्यात 4 जून रोजी जाहीर केलेल्या नियमावलीनुसार 5 गटांमध्ये जिल्हे आणि महानगरपालिकांची विभागणी करण्यात आली होती. त्यामध्ये त्या त्या जिल्ह्यातील पॉझिटिव्हिटी दर आणि ऑक्सिजन बेड यांच्या उपलब्धतेचं प्रमाण लक्षात घेऊन सर्वांत कमी दर असणारे जिल्हे पहिल्या गटात यानुसार पाचव्या गटापर्यंत विभागणी करण्यात आली होती. त्यानुसार, या प्रत्येक गटानुसार निर्बंध अधिकाधिक कठोर करण्यात आले होते. मात्र, आज राज्य सरकारने जाहीर केलेल्या निर्णयानुसार आता पॉझिटिव्हिटी रेट किंवा बेड उपलब्धतेचं प्रमाण कितीही कमी असलं, तरी राज्यातील सर्व जिल्हे आणि महानगर पालिका पुढील आदेश येईपर्यंत या तिसऱ्या गटाच्या वरच असणार आहेत.