Gondia Accident Latest News : जैन धर्मातील दिगंबर पंथियांचे संत आचार्य विद्यासागर महाराज यांचा वृद्धापकाळाने निधन झालं. छत्तीसगडच्या डोंगरगड इथं त्यांचा मृत्यू झाला. यानंतर त्यांच्या अंत्यदर्शनाला जाणाऱ्या भाविकांच्या गाडीचा भीषण अपघात झाल्याचा प्रकार समोर आला आहे.

मिळालेल्या माहितीनुसर, गोंदियाच्या सालेकसा जवळील पानगाव येथे हा अपघात झाला. या दुर्घटनेत तीन भाविकांचा जागीच मृत्यू झाला तर इतर तीन भाविक जखमी झाले आहेत. त्यांच्यावर सालेकसा येथील ग्रामीण रुग्णालयात उपचार सुरू आहेत.

या दुर्घटनेबद्दल अधिकची माहिती अशी की, मध्यप्रदेश राज्यातील रिवा जिल्ह्यातून छत्तीसगडच्या डोंगरगड येथे हे भाविक निघाले होते. मात्र वाटेत गोंदिया जिल्ह्यातील सालेकसा तालुक्यातील पानगाव येथे चालकाचे गाडीवरील नियंत्रण सुटल्यामुळे ती पुजारीटोला धरणाच्या कालव्यामध्ये कोसळली. या कालव्यामधील पाण्यात बुडून या तीन भाविकांचा मृत्यू झाला.