सोलापूर : मार्चअखेरमुळे महावितरणकडून वीजबिल थकबाकी वसुली मोहीम वेगाने राबविली जात आहे. वीजबिल वसुलीवेळी थकबाकीदार ग्राहक आणि महावितरणचे कर्मचारी यांच्यात वादविवादाच्या घटना घडतात. यातून थेट कर्मचाऱ्यांवर हल्ला करण्यापर्यंत थकबाकीदारांची मजल जाते. यापूर्वी अशा अनेक घटना घडल्या आहेत. परंतु महावितरण कर्मचाऱ्यांवर हल्ला केल्यास हल्लेखोरास पोलिस कोठडीची हवा खावी लागणार आहे.

अशा घटनांत महावितरणने थेट फौजदारी कारवाई केली आहे. महावितरणकडून थकबाकी वसुलीसाठी नियमित प्रयत्न सुरू आहेत. आता मार्च अखेरमुळे वसुलीचे उद्दिष्ट पूर्ण करण्यासाठी मोहीम सुरू आहे. त्यासाठी वीजजोड तोडणी केली जात आहे. थकबाकी व पुनर्जोडणी शुल्क भरल्यानंतरच वीजपुरवठा पूर्ववत केला जात आहे. मात्र, वसुली मोहिमेवेळी शिवीगाळीसह कर्मचाऱ्यांच्या अंगावर जाण्याच्या आणि त्यांच्यावर हल्ले केल्याच्या घटनाही घडल्या आहेत.

ग्राहकांच्या दुर्लक्षामुळे अधिकारीही वसुली मोहिमेत

वीज वापरानंतर ग्राहकांनी नोंदणी केलेल्या मोबाईलवर मीटर रीडिंगसह वीजबिलाचे विवरण पाठविले जाते. शिवाय घरी बिलेही पोच केली जातात. महिनाभर वीज वापरूनही ग्राहक बिल भरण्याकडे दुर्लक्ष करतात. त्यामुळे अशा ग्राहकांविरोधात महावितरणला कठोर भूमिका घ्यावी लागते. वर्ष अखेरमुळे आता थकबाकी वसुलीसाठी अधिकारीही मोहिमेत सहभागी झाले आहेत. थकबाकी न भरणाऱ्या ग्राहकांचे वीजजोड तोडले जात आहेत. या माध्यमातून थकबाकी वसुली मोहीम तीव्र करण्यात आली आहे.

यामुळे वीज कर्मचाऱ्यांवर हल्ले

• वारंवार सूचना देऊनही वीजबिल न भरल्यामुळे वीजपुरवठा खंडित केला जातो. मात्र, त्यानंतरही वीजजोड तोडल्यामुळे वीज कर्मचाऱ्यांवर हल्ले होतात.

• उन्हाळ्यात सतत वीजपुरवठा खंडित होतो. त्यातून वाद होऊन कर्मचाऱ्यांना मारहाण करण्यापर्यंत घटना जातात.

• नादुरुस्त मीटरमुळे वाढीव वीजबिले दिली जातात. यातूनही ग्राहक संतप्त होऊन कर्मचाऱ्यांना मारण्यापर्यंत मजल गाठतात.

शासकीय कामात अडथळ्याचा गुन्हा

वीजबिल थकबाकी वसुली, वीजपुरवठा खंडित केल्यावर कर्मचाऱ्यांवर हल्ला केल्यास संबंधित ग्राहकावर शासकीय कामात अडथळा आणल्याचा फौजदारी गुन्हा दाखल केला जातो.

ग्राहक ग्राहक संख्या थकबाकी

• घरगुती २ लाख ८ हजार २७ ३३ कोटी १८ लाख २७ हजार

• वाणिज्य १६ हजार ८४१ ६ कोटी ६५ लाख ४६ हजार

• उद्योग ४ हजार ५७४ ४ कोटी ३२ लाख ८१ हजार

• एकूण २ लाख २९ हजार ४४२ ४४ कोटी १६ लाख ५४ हजार