फलटण सातारा : खासदार उदयनराजे भोसले (Udayanraje Bhosale) यांना दुखावण्याचा जिल्हाध्यक्ष विक्रम पावसकर (Vikram Pawaskar) यांचा कोणताही हेतू नव्हता व आगामी काळातही नसेल. आगामी होणाऱ्या लोकसभा निवडणुकीत (Lok Sabha Election) उदयनराजे भोसले यांनीच सातारा मतदारसंघातूनच निवडणूक लढवावी. भारतीय जनता पार्टीला जर पुन्हा मला संधी द्यायची असेल तर त्यांनी माढा मतदारसंघातूनच (Madha constituency) द्यावी, असं स्पष्टीकरण भाजपचे खासदार रणजितसिंह नाईक-निंबाळकर (Ranjitsingh Naik-Nimbalkar) यांनी दिले.

फलटण (Phaltan) येथे झालेल्या कार्यक्रमावेळी भारतीय जनता पक्षाचे (Bharatiya Janata Party) जिल्हाध्यक्ष पावसकर यांनी चेस्टा मस्करीत केलेल्या विधानाचा विपर्यास झाला आहे, असं सांगून खासदार रणजितसिंह म्हणाले, राज्यसभेचे खासदार उदयनराजे भोसले व सातारा हे एक वेगळंच समीकरण आहे. आगामी काळात सुद्धा तेच समीकरण बरकरार राहिल. सातारा लोकसभा मतदारसंघामधून उदयनराजे भोसले यांनाच उमेदवारी देण्यात यावी. भारतीय जनता पक्षाला जर खासदारकीसाठी माझा पुन्हा विचार करायचा असेल तर, तो माढा लोकसभा मतदारसंघासाठीच करावा, असं स्पष्ट मत त्यांनी व्यक्त केलं.

खासदार उदयनराजे आणि मी जवळचे मित्र आहोत. उदयनराजे यांची जागा मी कधीही घेऊ शकत नाही. विक्रम पावसकर यांनी केलेल्या विधानाने उदयनराजे भोसले यांना दुखावण्याचा कोणताही हेतू नव्हता व आगामी काळात सुद्धा नसेल. उदयनराजे भोसले हे अतिशय दिलखुलास व्यक्तिमत्व असून त्यांचा स्वभाव सुद्धा दिलदार आहे. उदयनराजे हे माझ्या पाठीशी कायमच ठामपणे उभे आहेत. मी केलेल्या कोणत्याही संघर्षात मग अगदी तो नीरा देवधरचा संघर्ष असला तरी ते माझ्या पाठीशी उभे राहिले. त्यांनी कधीही मागे पुढे सुध्दा बघितले नाही. आगामी होणाऱ्या लोकसभा निवडणुकांत उदयनराजे भोसले यांनीच सातारा मतदारसंघातूनच निवडणूक लढवावी, असं त्यांनी शेवटी सांगितलं.