मुंबई - शिवसेनेचे नेते एकनाथ शिंदे यांनी अर्ध्याहून अधिक शिवसेना आमदार घेऊन बंड पुकारलं होतं. त्यामुळे शिवसेना पक्षप्रमुख उद्धव ठाकरे यांना मुख्यमंत्रीपदावरून पायउतार व्हावं लागलं. तसेच त्यांनी मुख्यमंत्र्यांसाठीचा वर्षा बंगला देखील सोडला. सरकार अल्पमतात आल्यानंतर उद्धव ठाकरे यांनी मुख्यमंत्रीपदाचा राजीनामा दिला होता. तसेच विधान परिषद सदस्यात्वाचा राजीनामा देणार असल्याचं म्हटलं होतं. मात्र आता उद्धव ठाकरे यांनी आपला निर्णय बदलला आहे. (Uddhav Thackeray News In Marathi)

उद्धव ठाकरे यांनी बदलेल्या निर्णयामुळे ते पुन्हा परत येणार का, अशा चर्चा सुरू झाल्या आहेत. उद्धव यांनी काँग्रेसच्या नेत्यांसोबत चर्चा केल्यानंतर विधान परिषद सदस्यत्वाचा राजीनामा न देण्याचा निर्णय घेतल्याचं सांगण्यात येत आहे. काँग्रेस नेत्यांनी राजीनामा न देण्याचा सल्ला उद्धव ठाकरे यांना दिल्याचं समजत.

उद्धव ठाकरे यांच्या गळ्यात अनपेक्षितपणे मुख्यमंत्रीपदाची माळ पडली होती. त्यांनी यापूर्वी एकही निवडणूक लढवली नव्हती. त्यामुळे त्यांनी विधान परिषदेचा मार्ग निवडला होता. मात्र मुख्यमंत्रीपदावरून पायउतार होताच, त्यांनी विधान परिषद सदस्यत्वाचा राजीनामा देण्याची घोषणा केली होती. त्यामुळे ते पक्षसंघटनेकडे लक्ष केंद्रीत करणार अशा चर्चा सुरू झाल्या होत्या. मात्र त्यांनी आपला निर्णय बदलला असून ते विधान परिषदेतून सत्ताधाऱ्यांना आव्हान देण्याची शक्यता आहे.

दोन दिवसांपूर्वी इंडिया टुडे- सी व्होटरच्या सर्व्हेत भाजप-शिंदे गटाला लोकसभा निवडणुकीत मोठा धक्का बसणार असल्याचा अंदाज वर्तविण्यात आला. तर तिकडे संजय शिरसाट यांनी उद्धव ठाकरे यांना महाराष्ट्राचे कुटुंबप्रमुख म्हणून संबोधलं होतं. यावरून शिंदे गटात नाराजीची ठिणगी पडल्याची चर्चा सुरू झाली आहे.