मुंबई : पश्चिम बंगालच्या मुख्यमंत्री ममता बॅनर्जी (West Bengal CM Mamata Banerjee) या तीन दिवस महाराष्ट्र दौऱ्यावर (Mamata Banerjee Maharashtra Visit) आहेत. यावेळी त्या मुख्यमंत्री उद्धव ठाकरेंची (Maharashtra CM Uddhav Thackeray) भेट घेणार होत्या. मात्र, मुख्यमंत्री आजारपणामुळे विश्रांती घेत आहेत. त्यामुळे ते ममता यांना भेटणार नाही, असं शिवसेनेकडून सांगण्यात आलं आहे.

मुख्यमंत्री उद्धव ठाकरेंवर काही दिवसांपूर्वीच शस्त्रक्रिया पार पडली. त्यानंतर सध्या ते विश्रांती घेत आहेत. त्यामुळेच ममतांच्या दोन दिवसीय दौऱ्यादरम्यान मुख्यमंत्री त्यांना भेटणार नाही, असं शिवसेनेकडून सांगण्यात आलं आहे. तसेच मंत्री आदित्य ठाकरे यांच्यासोबत आज रात्री आठ वाजता ममता बैठक घेणार आहेत. तसेच संजय राऊत देखील या बैठकीला उपस्थित राहतील, अशी माहिती स्वतः राऊत यांनी दिली आहे.

बंगालमध्ये गुंतवणुकदारांना आकर्षित करण्याच्या उद्देशाने ममतांचा दौरा असून ममता बॅनर्जी उद्या १ डिसेंबरला मुंबईतील उद्योगपतींशी चर्चा करणार आहेत. पुढच्या वर्षी एप्रिल महिन्यात होणाऱ्या बंगाल ग्लोबल बिझनेस समिटसाठी आमंत्रणसुद्धा देणार आहेत. यावेळी ममता राष्ट्रवादीचे अध्यक्ष शरद पवार यांना देखील भेटणार आहेत.