Maharashtra Political News: राज्याच्या राजकारणात मोठ्या घडामोडी घडत असतानाच वंचित बहुजन आघाडीचे नेते प्रकाश आंबेडकर यांनी राष्ट्रवादी काँग्रेसमध्ये अद्याप बरेच काही राजकारण घडायचे बाकी आहे, असा दावा वंचित बहुजन आघाडीचे नेते प्रकाश आंबेडकर यांनी काल (बुधवारी) केला आहे.

प्रकाश आंबेडकर म्हणाले अजून दोन राजकीय बॉम्ब फुटायचे बाकी आहे. त्यानंतर महाराष्ट्राचे राजकारण स्थिर होईल, असा दावाही आंबेडकर यांनी केला आहे.

अकोला दंगलीसंदर्भात आंबेडकर यांनी मुख्यमंत्री एकनाथ शिंदे यांची सह्याद्री अतिथीगृहात भेट घेतली. त्यानंतर प्रसारमाध्यमांशी बोलताना त्यांनी राष्ट्रवादीच्या अंतर्गत राजकारणावर वक्तव्य केलं आहे.

महाराष्ट्रात स्वतंत्रपणे निवडणूक लढविण्याची परिस्थिती असल्याची काँग्रेसने भूमिका घेतली आहे. तर दुसरीकडे राष्ट्रवादीमध्ये बरेच राजकारण घडायचे बाकी आहे. त्यानंतर जे काही बाहेर पडेल ते खरे बाहेर पडेल, असे मी मानतो असंही ते म्हणाले आहेत.

राज्यात धार्मिक तेढ वाढविण्याचा प्रयत्न सुरू असून दंगेखोरांवर कडक कारवाई केली जात नाही, तोपर्यंत या दंगली थांबणार नाहीत.

कर्नाटकमध्ये धार्मिकतेवर नाही तर तेथील मतदारांनी त्यांना जे योग्य वाटले त्यांना मतदान केले. त्यामुळे दंगलीतून मतदान बदलेल असा जो पूर्वीचा काळ होता तो आता संपुष्टात आलेला आहे, असेही प्रकाश आंबेडकर म्हणाले.

महाराष्ट्रातील जनमत भाजपविरोधात: शरद पवार

भाजपची सत्ता असलेल्या केंद्र व राज्य सरकारांच्या विरोधात सध्या सर्वसामान्यांचा कल असून, त्यामुळेच कर्नाटकमध्ये भाजपची सत्ता मतदारांनी घालवली, असे प्रतिपादन राष्ट्रवादी काँग्रेसचे नेते शरद पवार यांनी बुधवारी येथे केले.

कर्नाटकचा हा कल महाराष्ट्र सरकारच्या विरोधातही दिसतो. यामुळे आगामी सर्व निवडणुका महाविकास आघाडीच्या माध्यमातूनच लढायच्या आहेत. यामुळे आपापसातील मतभेद गाडून महाविकास आघाडी कशी भक्कम होईल याचा प्रत्येक नेत्याने व आमदाराने विचार करावा, असे आवाहन शरद पवार यांनी केले.