अली बाबा: दास्तान-ए-काबुलमध्ये मुख्य भूमिका निभावलेली टीव्ही अभिनेत्री तुनिषा शर्मा हिने गळफास घेऊन काल आत्महत्या केली. या प्रकरणी तुनिशाची आई वनिता शर्मा यांनी तुनिशाचा को स्टार अभिनेता शीजान खान याच्याविरोधात वालीव पोलीस ठाण्यात तक्रार दाखल केली होती. तुनिशाची आई वनिता शर्मा यांच्या तक्रारीवरून शीजान खानविरोधात रात्री उशिरा भादंवि कलम 306 अन्वये गुन्हा दाखल करण्यात आला आहे. पोलिसांनी शीजान खानला रात्री उशिरा अटक केली असून त्याची कसून चौकशी पोलीस करत आहेत.

वनिता शर्मा यांच्या तक्रारीनंतर शीजान खानला पोलिसांनी रात्री अटक केली. त्यानंतर मध्यरात्री त्याची वैद्यकिय चाचणी केली. नंतर त्याला वालीव पोलीस स्टेशनच्या कोठडीत ठेवण्यात आलं. सोनी सब चॅनेरवर सुरू असणाऱ्या अली बाबा: दास्तान-ए-काबुल या मालिकेत तुनिशा आणि शीजान खान दोघेही मुख्य भूमिकेत होते. या दोघांचे प्रेम संबंध असून त्यानेच तिला आत्महत्येस प्रवृत्त केल्याची तक्रार तुनिशाच्या आईने दिल्यामुळे हा गुन्हा दाखल करण्यात आला आहे.

तर तुनिशाने बाबा: दास्तान-ए-काबुल सीरियलच्या सेटवर ज्या मेकअप रुममध्ये फाशी घेऊन आत्महत्या केली. ती रूम शीजानची आहे. शुटिंग संपवून परत आलो. मेकअप रुमचा दरवाजा आतून बंद होता. दरवाजा तोडून आत शिरलो. त्यावेळी तुनिशाने आत्महत्या केली होती असं शीजानने सांगितलं होतं. तर शीजानला आज वसई कोर्टात हजर करण्यात येणार आहे. तुनिशा आणि शीजान दोघेही रिलेशनमध्ये होते. काही दिवसांपूर्वीच दोघंच ब्रेकअप झालं होतं. यामुळे तुनिशा मानसिक तणावाखाली होती. त्यातूनच तिने आत्महत्येचं पाऊल उचलल्याचं बोललं जात आहे.