स्टार प्रवाह वाहिनीवरील 'आई कुठे काय करते' (Aai Kuthe Kay Karte) ही मालिका लोकप्रियतेच्या शिखरावर आहे. या मालिकेच्या प्रत्येक भूमिकेने प्रेक्षकांच्या मनावर छाप सोडली आहे. तर अनेक पुरस्कारही या मालिकेने आपल्या नावे केले आहेत. यामध्ये अरुंधतीची भूमिका साकारणारी अभिनेत्री मधुराणी गोखले प्रभुलकर (Madhurani Prabhulkar) यांची प्रचंड लोकप्रियता आहे. सोशल मीडियावर त्या नेहमीच सक्रिय असतात. मालिकेविषयी आणि पडद्यामागे घडणाऱ्या गमतीजमतीविषयी त्या पोस्टद्वारे चाहत्यांसोबत शेअर करत असतात. मात्र गेल्या काही दिवसांपासून त्यांनी या मालिकेतून ब्रेक घेतल्याची माहिती समोर येत आहे.

मालिकेत गेल्या दोन-तीन भागांमध्ये प्रेक्षकांना अरुंधती पहायला मिळाली नाही. त्यामुळे नेमकं काय झालं, ती कुठे गेली असा प्रश्न चाहत्यांना पडला आहे. यामागचं कारण आता समोर आलं आहे. अरुंधती साकारणाऱ्या मधुराणी यांची तब्येत ठीक नसल्याने त्यांनी काही दिवस सुट्टी घेतली आहे. त्यामुळेच मालिकेत त्या गैरहजर आहेत.

मधुराणी या लवकरात लवकर बरे होऊन मालिकेत परत यावं, असं चाहत्यांनी म्हटलंय. मालिकेत मधुराणी यांच्यासोबतच मिलिंद गवळी आणि रुपाली भोसले यांच्याही मुख्य भूमिका आहेत. नुकताच मालिकेत अनघा-अभिषेकच्या लग्नाचा थाट पहायला मिळाला. या लग्नाच्या शूटिंगदरम्यान सेटवर कलाकारांनी खूप धमाल केली. त्याचे किस्से, व्हिडीओ, फोटो या कलाकारांनी सोशल मीडियावर पोस्ट केले आहेत.