आज मनोरंजन क्षेत्राची चित्रपट, मालिका, वेबसिरिज , जाहिराती, इव्हेन्टस अशी चौफेर वाटचाल सुरु असून काही कलाकारही याच चौफेरपणे आपली कारकिर्द आखत आहेत. अजिंक्य देवचे(Ajinkya Deo) याबाबत आवर्जून नाव घ्यायला हवे. त्याची भूमिका असलेला 'झोलझाल ' हा मराठी चित्रपट प्रदर्शनास सज्ज झाला आहे.

शोमन निर्माते सुभाष घई यांच्या मुक्ता आर्टसच्या वतीने निर्माण होत असलेल्या लोकेश गुप्ते दिग्दर्शित 'माय डॅडस वेडिंग ' या मराठी चित्रपटातही अजिंक्य देवची महत्वाची भूमिका असून १७ जूनपासून या चित्रपटाचे लंडन येथे चित्रीकरण सुरु होत आहे. तर आपला भाऊ अभिनय देव याच्या दिग्दर्शनातील 'ब्राऊन ' या वेबसिरिजमध्ये अजिंक्य देव करिष्मा कपूरसोबत भूमिका साकारत आहे.

त्याशिवाय बिजाॅय नंबियार दिग्दर्शित 'काला ' या टी सिरीज निर्मित वेब सिरिजमध्येही अजिंक्य देवने भूमिका साकारली आहे. या वेबसिरिजचे बरेचसे चित्रीकरण कोलकाता येथे झाले आहे. आपल्या अशा चौफेर कामाचा आनंद घेत घेत अजिंक्य देव पुढे सरकतोय.