अक्षय कुमारचा(Akshay Kumar) बहुचर्चित सिनेमा 'बच्चन पांड्ये' (Bachchhan Paandey) होळीला म्हणजे १८ मार्चला सिनेमागृहात आपल्या भेटीस येत आहे. पण त्याआधी १८ फेब्रुवारीला सिनेमाचा ट्रेलर प्रदर्शित होणार असल्याची माहिती स्वतः अक्षय कुमारनं त्याच्या ट्वीटर अकाऊंटवरनं दिली आहे. पण त्याआधी चर्चा सुरू झाली आहे ती सिनेमाच्या नावाच्या स्पेलिंगमध्ये केलेल्या बदलावरुन.जो बदल अक्षयनं त्याच्या पोस्टमध्ये अधोरेखित केला आहे. २०२२ मधील अक्षयचा सिनेमागृहात प्रदर्शित होणारा अक्षयचा हा पहिलाच सिनेमा आहे. त्यामुळे अर्थातच अक्षयच्या चाहत्यांच्या मनात त्याच्या या सिनेमाला घेऊन मोठी उत्सुकता पहायला मिळत आहे. (Akshay Kumar share Bachchhan Paandey Post)

आज अक्षय कुमारनं ट्वीटरवर एका पोस्टच्या माध्यमातून सिनेमातला आपला लूक आणि ट्रेलर प्रदर्शित होणार असल्याची माहिती सिनेमाचा नवा पोस्टर शेअर करून दिली आहे. अक्षयने त्या पोस्टसंदर्भात लिहिलं आहे की,''या सिनेमातील माझ्या भूमिकेच्या खूप छटा आहेत. जसं की एका रंगाच्या अनेक शेड्स...बच्चन पांड्ये तुम्हला घाबरवायला,हसवायला,रडवायला येतोय,तुम्ही तयार आहात? विनंती आहे,बच्चन पांड्येला प्रेम द्या. सिनेमाचा ट्रेलर तुमच्या भेटीस येतोय १८ फेब्रुवारीला''. अक्षयने सिनेमाचा जो पोस्टर शेअर केला आहे त्यात सिनेमाच्या टायटलमधील स्पेलिंग बदलही नजरेस पडतोय. पोस्टरवरचा अक्षयचा लूक खरंच भीती वाटेल असाच आहे. पोस्टरवर लिहिलंय-''मुझे भाई नही,गॉडफादर बोलते है''.

नवीन पोस्टरवर बच्चन पांड्येचं स्पेलिंग आहे BACHCHHAN PAANDEY. म्हणजे टायटलच्या स्पेलिंगमध्ये एक H आणि एक A अतिरिक्त जोडले आहेत. याआधी १८ जानेवारीला सिनेमाची नवी तारिख जेव्हा घोषित झाली होती तेव्हा बच्चन पांड्येची स्पेलिंग होती BACHCHAN PANDEY. बच्चन पांड्येचं दिग्दर्शन फरहाद सामजी यानं केलं आहे,तर निर्माता साजिद नाडियादवाला आहे. या दोघांसोबतही अक्षयने बरेच सिनेमे केले आहेत. 'एंटरटेनमेंट','हाऊसफुल ३','हाऊसफुल ४' या अक्षयच्या सिनेमांचं दिग्दर्शन फरहादने केले आहे. 'बच्चन पांड्ये' सिनेमात अक्षयसोबत कृति सनन,जॅकलीन फर्नांडिस,अर्शद वारसी देखील महत्त्वाच्या भूमिकांमध्ये दिसणार आहेत.