बॉलिवूड अभिनेत्री आलिया भट गेल्या काही दिवसांपासून चर्चेत आहे. तिचे नवे चित्रपट, गरोदरपण आणि आता तिची काही मतं. एका मुलाखतीत तिने मांडलेल्या मतांची सध्या जोरदार चर्चा होतेय. स्टार्सला मिळणारा मोबदला, त्यांचा पगार याविषयी तिने भाष्य केलंय.

एखादा पिक्चर फ्लॉप झाला, तर त्यातला कलाकारांना किती मोबदला मिळतो असा प्रश्न आलियाला एका मुलाखतीत विचारण्यात आला होता. त्यावर तिने सांगितलं की, चित्रपटाच्या बजेटच्या हिशोबाने कलाकारांचा मोबदला असायला हवा. पण कोणी किती पैसे घ्यावेत हे मी सांगणारी कोण? मी तर अजून खूप लहान आहे.

आलिया पुढे म्हणाली की, अनेक कलाकार असेही आहेत की पिक्चर जर फ्लॉप झाला तर ते आपलं मानधन घेत नाहीत, किंवा मिळालेलं मानधन परत करतात. मला विचाराल तर या सगळ्यावर नीट विचार व्हायला हवा. निर्माते आणि कलाकारांनी सुद्धा या अँगलने विचार करायला हवा.

आलिया भटचा डार्लिंग्ज हा चित्रपट लवकरच नेटफ्लिक्सवर येतोय. या चित्रपटाच्या माध्यमातून ती निर्माती म्हणून डेब्यू करतेय. आलियाचं प्रॉडक्शन हाऊस इटर्नल सनशाईन आणि शाहरुख खानचं प्रॉडक्शन हाऊस रेड चिलीज एंटरटेनमेंट या दोघांची निर्मिती असलेला डार्लिंग्ज चित्रपट ५ ऑगस्टला रिलीज होतोय.