Chandramukhi : प्रसाद ओक (prasad oak) दिग्दर्शित 'चंद्रमुखी' या मराठी चित्रपटाची जोरदार चर्चा सुरु आहे. या चित्रपटातील गाणीही गाजत आहेत. 'चंद्रा' आणि 'बाई गं' या गाण्याला अक्षरशः प्रेक्षकांनी डोक्यावर घेतलं आहे. या गाण्यांसोबतच चर्चा आहे ती अभिनेत्री अमृता खानविलकरची. या चित्रपटातील चंद्रा म्हणजेच प्रमुख नायिका अमृता खानविलकर आहे. तिच्या नाजूक अदाकारी आणि नृत्याने चाहते घायाळ झाले आहे. त्यामुळे आता प्रत्येकाला चित्रपटगृहात जाऊन चित्रपट पाहण्याची उत्सुकता लागली आहे.

या चित्रपटाच्या प्रदर्शनाला केवळ एक दिवस उरलेला असताना 'चंद्रमुखी' म्हणजे अमृता खानविलकर थेट मुंबई विमानतळावर (एअरपोर्ट) पोहोचली आहे. मुंबई विमानतळावर ती आपल्या चित्रपटाच्या प्रमोशनसाठी गेली आहे. यावेळी घडलेली धमाल तिने व्हिडिओच्या माध्यमातून शेअर केली आहे. या व्हिडिओत अभिनेता आदिनाथ कोठारे (Adinath Kothare) आणि अमृता खानविलकर (Amruta Khanvilkar ) एकत्र दिसत आहे. आदिनाथ कोठारे या चित्रपटात दौलत देशमाने या प्रमुख भूमिकेत आहे.

अमृताने शेअर केलेल्या पहिल्या व्हिडिओत म्हणते, 'चित्रपट तुमच्यापर्यंत पोहोचवायला काय काय करावं लागतंय. आज माही एक धमाकेदार ऍक्टिव्हिटी करणार आहोत. या चित्रपटासाठी आम्ही अडीच वर्षे घाम गाळला, मेहनत घेतली आहे. अजूनही घेत आहोत. त्यामुळे हा चित्रपट तुम्ही उद्या २९ एप्रिल रोजी चित्रपट गृहात जाऊन बघा. बघा ना यार..' असं निवेदन तिनं चाहत्यांना केलं आहे. या व्हिडिओत अमृताने लाल रंगाची सुंदर नववारी साडी नेसली आहे.

तर पुढचा व्हिडीओ अत्यंत गमतीशीर आहे. या व्हिडिओत सामान, बॅग वाहून नेण्याच्या ट्रॉलीवर अमृता बसली असून आदिनाथ तिला ट्रॉलीमधूनच एरपोर्टवर फिरवत आहेत. या व्हिडिओला चंद्रा या गाण्याचे संगीत दिले आहे. तर अमृताने 'चंद्रा'च्या मुद्रेत पोज दिली आहे. अमृताच्या या ऍक्टिव्हिटीने सर्वांचे लक्ष वेधून घेतले आहे.