छोट्या पडद्यावरील प्रसिद्ध मालिका पवित्र रिश्तामधील मानव आणि अर्चना या जोडीला प्रेक्षकांची पसंती मिळाली होती. या मालिकेत दिवंगत अभिनेता सुशांत सिंग राजपूत (sushant singh rajput) याने मानवची तर अभिनेत्री अंकिता लोखंडेने (Ankita Lokhande) अर्चनाची भूमिका साकारली होती.'पवित्र रिश्ता' (Pavitra Rishta) या मालिकेला 12 वर्ष पूर्ण झाली आहेत. आता या मालिकेचा नवा सिझन लवकरच प्रेक्षकांच्या भेटीस येणार आहे. या सिझनचा प्रोमो नुकताच प्रदर्शित झाला आहे. अंकिताने हा प्रोमो सोशल मीडियावर शेअर केला आहे. प्रोमोमध्ये अंकिता पुन्हा अर्चनाच्या भूमिकेतून प्रेक्षकांच्या भेटीस येणार असून मानवच्या भूमिकेत अभिनेता शाहिर शेख दिसत आहे.

अंकिताने या मालिकेचा प्रोमो शेअर करून त्याला कॅप्शन दिले, 'लव्ह तो होगा ही ना इन द एअर, जब मानव और अर्चना आर देअर. त्यांच्या प्रवासामध्ये सहभागी व्हा. पवित्र रिश्ता, लवकरच #ZEE5 वर'. शाहिरने देखील प्रोमो सोशल मीडियावर शेअर केला आहे. त्याने कॅप्शनमध्ये लिहिले, 'एकमेकांसाठी खास असणाऱ्या दोन सामान्य लोकांची गोष्ट...'. या मालिकेची निर्माती एकता कपूरने पवित्र रिश्ता 2 ची घोषणा केली होती.

उषा नाडकर्णी आणि अभिज्ञा भावे हे मराठी कलाकार पवित्र रिश्ता-2 मध्ये महत्वपूर्ण भूमिकेत दिसणार आहेत. काही दिवसांपूर्वी अंकिताने या मालिकेच्या शूटिंग दरम्यानचे फोटो आणि व्हि़डीओ सोशल मीडियावर शेअर केले आहे. शाहिरसोबतचा फोटो शेअर करू अंकिताने त्याला कॅप्शन दिले होते, 'काही लव्ह स्टोरी या विलक्षण असतात. मानव आणि अर्चनाच्या या विलक्षण लव्हस्टोरीची मी साक्षीदार आहे, याचा मला आनंद आहे. पवित्र रिश्ता-2 लवकरच तुमच्या भेटीस येणार आहे.'