अभिनेता सुशांत सिंह राजपूत आणि अभिनेत्री अंकिता लोखंडे हे २०१६ पर्यंत एकमेकांना डेट करत होते. 'पवित्र रिश्ता' या मालिकेपासून या दोघांचं अफेअर सुरु झालं आणि सुशांत-अंकिता टेलिव्हिजन विश्वातील सर्वांत चर्चेतली जोडी ठरली. ब्रेकअपनंतरही अंकिता सुशांतच्या कुटुंबीयांच्या संपर्कात होती. जून २०२० मध्ये सुशांतच्या मृत्यूनंतर अंकिताने त्याच्या कुटुंबीयांना साथ दिली आणि सुशांतला न्याय मिळावा यासाठी तिने पाठपुरावा केला. आता नुकत्याच दिलेल्या एका मुलाखतीत तिने सुशांतसाठी मोठमोठे चित्रपट सोडल्याचा खुलासा केला. शाहरुख खानसोबत 'हॅपी न्यू इअर' आणि संजय लीला भन्साळींच्या 'बाजीराव मस्तानी', 'रामलीला' यांसारखे चित्रपट गमावल्याचं तिने सांगितलं. 

'बॉलिवूड बबल'ला दिलेल्या मुलाखतीत अंकिता म्हणाली, "मी बऱ्याच गोष्टींना गमावलं. फराह खानने मला हॅपी न्यू इअर चित्रपटाची ऑफर दिली होती आणि त्यासाठी मी शाहरुख सरांना पण भेटले होते. पण त्यावेळी मी सुशांतचा विचार करत होते. माझ्यापेक्षा जास्त चांगलं त्याचं होऊ दे असं मला त्यावेळी वाटत होतं. मला आजही त्या गोष्टींचा पश्चात्ताप होत नाही. मला सुशांतचं करिअर घडवायचं होतं आणि मी ते माझ्या परीने केलं. सुशांतच्या पाठीशी मला खंबीरपणे उभं राहायचं होतं आणि तेसुद्धा मी केलं. ब्रेकअपनंतर मला माझी खरी किंमत समजली. तेव्हा स्वत:साठीसुद्धा काहीतरी करायची इच्छा होऊ लागली."

हेही वाचा : "मराठी अभिनेत्री बोल्ड फोटो शेअर करू शकत नाही का?"; तेजस्विनी पंडितचा सवाल

अंकिताने संजय लीला भन्साळींसारख्या दिग्गज दिग्दर्शकांसोबत काम करण्याची संधी गमावली होती. याविषयी ती पुढे म्हणाली, "मला आठवतंय, संजय सरांनी मला कॉल केला होता आणि म्हणाले, बाजीराव मस्तानी चित्रपटात काम कर नाहीतर तुला पुढे जाऊन खूप पश्चात्ताप होईल. त्यावेळी मी लग्नाचं कारण देत नकार दिला. त्यावेळी मला हे बोलताना काहीच वाटलं नव्हतं. पण करिअर आणि खासगी आयुष्यात समतोल कसा राखावा हे मला आज समजतंय."

२०१९ मध्ये अंकिताने 'मणिकर्णिका : द क्वीन ऑफ झांसी' या चित्रपटात सहाय्यक अभिनेत्रीची भूमिका साकारत बॉलिवूडमध्ये पदार्पण केलं. त्यानंतर ती 'बागी ३' या चित्रपटातही झळकली. यामध्ये तिने रितेश देशमुखच्या पत्नीची भूमिका साकारली होती.