अनुपम खेर(Anupam Kher) यांचं आपल्या आईवर नितांत प्रेम आहे हे वारंवार दिसून आलंय. आपल्या शुटिंगच्या घाई-गडबडीतून वेळ काढत ते नेहमीच आईबरोबर वेळ घालवताना दिसतात. इतकंच नाही तर आईसोबतचे व्हिडीओही ते सोशल मीडियावर पोस्ट करताना दिसतात. आतापर्यंतच्या अनेक व्हिडीओतनं एक गोष्ट समोर आली आहे ती म्हणजे अनुपम खेर यांची आईही मजा-मस्ती करणारी आहे. कधीतर ते व्हिडीओ पाहून असाही भास होतो की अनुपम खेर यांच्यातले विनोदाचे अचूक टायमिंग त्यांच्या आईकडूनच आले असावे. आज अनुपम खेर यांनी एक व्हिडीओ पोस्ट केलाय त्यातनं त्यांच्या आईची एक हटके बाजू समोर आलीय.

त्या व्हिडीओमध्ये आपण पाहू शकाल की अनुपम खेर आणि त्यांची आई एका कोच वर बसलेले आहेत आणि गप्पा मारीत आहेत. तेवढ्यात अनुपम खेर त्यांच्याआईला मोबाईलमध्ये आपला सावत्र मुलगा सिकंदर खेर याचा फोटो दाखवून म्हणतात की, सिकंदरने आपल्याला न सांगता परस्पर लग्न केले आहे. खरंतर अनुपम खेर आपल्या आईसोबत प्रॅंक करण्याचा प्रयत्न करत आहेत. पण पुढे त्यांची आई दुलारीनं दिलेलं उत्तर ऐकाल तर अनुपम खेर यांचा पोपट कसा झाला हे कळेल. अर्थात या व्हिडीओला त्यांनी कॅप्शनंच दिलंय की,'आईने केला माझा पोपट'(मॉं ने किया मेरा पोपट)

अनुपम खेर यांनी सिकंदरने लग्न केल्याची बातमी दिली तेव्हा दुलारी खेर बोलतात ,''अरे काय झालं लग्न केलं म्हणून. जग बदलतंय,आपणही बदलायला हवंय. मी तर खूप खुश आहे माझ्या नातवानं लग्न केलंय याबद्दल. खरंतर अनुपम यांना वाटलं होतं त्या अपसेट होतील. पण झालं उलटंच. खरंतर सिकंदर खेरने आपल्या शुटिंग निमित्तानं घातलेल्या दुल्हेराजाच्या ड्रेसवर काढलेला फोटो सहज अनुपम यांना पाठवला होता. त्या फोटोवरून त्यांनी आईसोबत प्रॅंक करायचं ठरवलं पण इथे त्यांचाच पोपट झाला. तेव्हा अनुपम म्हणाले,''ही जगातली सगळयात पुढारलेली आई आहे''.