एका अंतर्वस्त्राच्या ब्रँडसाठी फोटोशूट केल्यानंतर बलात्काराच्या धमक्या येत असल्याचा खुलासा दिग्दर्शक-निर्माता अनुराग कश्यपची मुलगी आलियाने केला. सोशल मीडियावर अत्यंत घृणास्पद व अश्लील भाषेत टिप्पणीही केली जात असल्याची तक्रार तिने केली. धमक्यांनंतर तिने फोटोशूटसुद्धा हटवण्याचा विचार केला होता. सोशल मीडियावर पोस्ट लिहित आलियाने हे संपूर्ण प्रकरण सांगितलं. 

काय आहे आलियाची पोस्ट?
'माझ्या मानसिक स्वास्थ्यासाठी मागील काही आठवडे खूपच कठीण गेले आहेत. जेव्हापासून मी माझ्या फोटोशूटचा फोटो पोस्ट केला, तेव्हापासून माझ्यावर अत्यंत अर्वाच्च व अश्लील भाषेत टिप्पणी केली जात आहे. मी कधीच इतके घाबरले नव्हते. माझं इन्स्टाग्राम अकाऊंट डिलिट करण्याचा विचार मी केला होता. या सर्व गोष्टींकडे दुर्लक्ष करून मी त्याबद्दल मौन बाळगणार होती. मात्र अशा गोष्टी बोलून दाखवायची खरी गरज आहे. कारण अशाच गोष्टींमुळे भारतात आणि जगात इतर ठिकाणी बलात्काराच्या घटना घडतात', अशी पोस्ट आलियाने लिहिली. 

हेही वाचा : राखीच्या मदतीला धावून आला 'भाईजान'; कॅन्सरग्रस्त आईने हात जोडून मानले आभार

'मला आणि इतर महिलांना त्रास देणारे बहुतांश लोक हे ढोंगी आहेत. त्यांना असं वाटतं की ते नैतिकदृष्ट्या खूप उच्च स्थानावर आहेत, मात्र अशीच लोकं बलात्काराच्या घटनांना प्रोत्साहन देतात', असं लिहित आलियाने कमेंट्सचे स्क्रिनशॉट पोस्ट केले. 

हेही वाचा : ...अन् त्या महिलेनं दीपिकाची पर्सच खेचली

आलियाने याआधीही सोशल मीडियावरील ट्रोलिंगबद्दल भाष्य केलं होतं. आलिया ही अनुराग कश्यप व त्याची पत्नी आरती बजाज यांची मुलगी आहे. आलियाच्या बॉलिवूड पदार्पणाबाबत चर्चा असताना तिच्या सोशल मीडियावरील फॅन फॉलोइंगमध्येही मोठी वाढ होत आहे. दिवंगत अभिनेत्री श्रीदेवी यांची मुलगी खुशी कपूर आलियाची खास मैत्रीण आहे. याशिवाय तिला अनेकदा शाहरुख खानचा मुलगा अबरामसोबतही पाहिलं गेलंय. २०१७ मध्ये तिने मुलींच्या शिक्षणाशी निगडीत विषयावर माहितीपट बनवला होता.