गँगस्टर अरुण गवळी यांची मुलगी योगिता गरोदर असून पती अक्षय वाघमारेनं सोशल मीडियावर फोटो पोस्ट करत चाहत्यांना ही आनंदाची बातमी सांगितली. मराठी अभिनेता अक्षय व योगिताने ८ मे २०२० रोजी लग्नगाठ बांधली होती. लॉकडाउनमध्ये या दोघांचा विवाहसोहळा पार पडला होता. आता अक्षयने त्याच्या इन्स्टाग्राम अकाऊंटवर योगितासोबतचा फोटो पोस्ट करत ती गरोदर असल्याचं सांगितलं. 

'आयुष्याचा एक नवीन प्रवास लवकरच सुरू होणार आहे. नव्या पाहुण्याच्या आगमनाची वाट पाहतोय', असं लिहित अक्षयने चाहत्यांना आनंदाची बातमी सांगितली. या फोटोमध्ये योगिताचा बेबी बंप पाहायला मिळतोय. 

हेही वाचा : 'बिग बॉस मराठी' फेम शिव ठाकरे बनला उद्योजक; पाहा व्हिडीओ

अक्षय-योगिताची लव्हस्टोरी
अक्षय आणि योगिता हे लग्नाच्या आधी पाच वर्षांपासून एकमेकांना ओळखत होते. अक्षयने 'बेधडक', 'दोस्तीगिरी' यांसारख्या मराठी चित्रपटांमध्ये भूमिका साकारल्या आहेत. त्याची 'फत्तेशिकस्त' या चित्रपटातील भूमिका विशेष गाजली होती. तर योगिता एका सामाजिक संस्थेसाठी काम करते. योगिताने काही मराठी चित्रपटांची निर्मितीदेखील केली आहे. याचदरम्यान या दोघांची ओळख झाली आणि हळूहळू मैत्रीचं प्रेमात रुपांतर झालं. 

हेही वाचा : आस्ताद-स्वप्नालीच्या रजिस्टर मॅरेजचा थाटच निराळा! 

लॉकडाउनमध्ये झालं लग्न
अक्षय आणि योगिता २९ मार्च २०२० रोजी लग्नबंधनात अडकणार होते. मात्र कोरोना महामारी आणि अचानक जाहीर झालेला लॉकडाउन यांमुळे त्यांनी लग्नाची तारीख पुढे ढकलली होती. मे महिन्यात लॉकडाउनचे नियम थोडे शिथिल झाल्यानंतर मोजक्या पाहुण्यांच्या उपस्थितीत, सर्व नियम पाळत मुंबईतल्या दगडी चाळीत यांचा विवाहसोहळा पार पडला.