Drugs Case: ड्रग्ज प्रकरणात अटकेत असलेल्या अभिनेता शाहरुख खानचा मुलगा आर्यनला Aryan Khan नार्कोटिक्स कंट्रोल ब्युरोच्या (एनसीबी) चौकशीदरम्यान रडू कोसळलं. आर्यन खानला रविवारी मुंबई क्रूज ड्रग्ज प्रकरणात अटक करण्यात आली. चौकशीदरम्यान आर्यन ढसाढसा रडत असल्याचं वृत्त 'इंडिया टुडे'नं दिलं आहे. आर्यन गेल्या चार वर्षांपासून ड्रग्जचं सेवन करत असल्याचीही माहिती समोर आली आहे. युके, दुबई आणि इतर देशांमध्ये असतानाही तो ड्रग्जचं सेवन करत असल्याची माहिती एनसीबीच्या सूत्रांनी दिली. आर्यनला वडील शाहरुखशी फोनवर दोन मिनिटं बोलण्याची संधी देण्यात आली होती.

क्रूझ सफारीवर रेव्ह पार्टीसाठी ड्रग्ज

मुंबईहून गोव्याला जाणाऱ्या आलिशान क्रूझ सफारीच्या जाहिरातीसाठी सोशल मीडियाचा वापर करण्यात आला होता. नेमकी त्याची दखल एनसीबीच्या पथकाने घेतली आणि कारवाईचे सत्र सुरू झाले. मुंबई ते गोवा या तीन दिवसांच्या क्रूझ सफारीवर श्रीमंत घरची मुले सहभागी असल्याने अमली पदार्थ आणि रेव्ह पार्टीचे आयोजन असल्याचा संशय एनसीबीला आला. एनसीबीने सापळा रचून या क्रूझवर प्रवेश केला. पार्टी सुरू होताच दबा धरून बसलेले एनसीबी अधिकाऱ्यांनी अचानक छापे घालत कोकेन, चरस, हशीश, एमडी, एमडीएमए जप्त केले व क्रूझवरील तरुणांना ताब्यात घेतले.

ड्रग्स आणण्यासाठी युक्ती

कोकेन, चरस, हशीश, एमडी, एमडीएमएसारखे ड्रग्ज क्रूझवर आणण्यासाठी या पार्टीला आलेल्या प्रत्येकाने शक्कल लढविल्याचे तपासात उघडकीस आले. यात शाहरूख खानचा मुलगा आर्यन याने तर डोळ्याच्या लेन्सच्या डब्यातून ड्रग्ज नेल्याचे समोर आले, तर कुणी कंबरपट्टा, अंतर्वस्त्र आदींचा वापर केल्याचे एनसीबीच्या सूत्रांकडून समजते. पुरुषांच्या शर्टाची कॉलर, हाताच्या बाह्या, पॅन्टच्या कमरपट्ट्याजवळील शिलाई उसवून, महिलांच्या हँडबॅगच्या हँडलमध्ये लपवून अमली पदार्थ आणले होते.