झी मराठी वाहिनीवरील 'अग्गंबाई सासूबाई' ही मालिका अल्पावधीतच चर्चेत आली. यातील आसावरी, अभिजीत, शुभ्रा आणि बबड्या हे पात्रं प्रेक्षकांना चांगलेच लक्षात राहणार आहे. ही मालिका लवकरच प्रेक्षकांचा निरोप घेणार असून त्याच्या जागी 'अग्गंबाई सूनबाई' ही मालिका प्रेक्षकांच्या भेटीला येणार आहे. या नव्या बदललेल्या मालिकेत आसावरी आणि अभिजीत यांच्या भूमिका त्याच असल्या तरी शुभ्रा आणि बबड्या बदलले आहेत. 'अग्गंबाई सासूबाई' या मालिकेला निरोप देताना बबड्याची भूमिका साकारणारा अभिनेता आशुतोष पत्की याने सोशल मीडियावर भलीमोठी पोस्ट लिहिली आहे. 

काय आहे आशुतोषची पोस्ट- 
'सोहम उर्फ बबड्या.. काही वर्षांनी मागे वळून पाहिल्यावर हे पात्र कायम एक नंबरवर असेल माझ्यासाठी, कारण अग्गंबाई सासूबाई ही मालिका मला खूप काही शिकवून गेली. मराठी भाषेपासून, कलाकाराने कॅमेरासमोर भावना कशा व्यक्त कराव्यात आणि लोकांच्या मनाचा कसा ठाव घ्यावा हे या मालिकेने शिकवलं. सगळ्या दिग्गज कलाकारांच्या सहवासात खूप शिकलो. सगळ्यांनी मला मनापासून सांभाळून घेतलं यासाठी मी खूप आभारी आहे. झी मराठी आणि आमचे निर्माते सुनील भोसले यांचा मी आभारी आहे की सोहम म्हणून त्यांनी माझ्यावर विश्वास दाखवला आणि तुम्ही मायबाप प्रेक्षक तुम्हीसुद्धा खूप प्रेम दिलंत. हे पहिलं पर्व संपताना सगळा प्रवास आठवतो. खूप आठवण येईल सगळ्यांची पण पिक्चर अभी बाकी है मेरे दोस्त. लवकरच एक नवीन चेहरा घेऊन पुन्हा तुमच्या भेटीला येईन आणि पुन्हा नव्याने तुमच्या मनात घर करण्याचा प्रयत्न करीन.'

हेही वाचा : दुसऱ्यांदा लग्नबंधनात अडकला मराठी अभिनेता; जाणून घ्या त्याच्या पत्नीबद्दल
 

या पोस्टच्या शेवटी आशुतोषने नव्या मालिकेला शुभेच्छा दिल्या आहेत. या नव्या पर्वात सोहमची भूमिका अभिनेता अद्वैत दादरकर साकारणार आहे. अद्वैतने 'माझ्या नवऱ्याची बायको' या मालिकेत सौमित्रची भूमिका साकारली होती. या मालिकेनेसुद्धा नुकताच प्रेक्षकांचा निरोप घेतला.